АНУ-д тус улсын хамгийн өндөр настай, мөн хамгийн удаан хугацаанд хоригдсон хүмүүсийн нэг гэгдэж байсан Фрэнсис Клиффорд Смит 102 дахь насандаа нас баржээ. Тэрээр 6-р сарын 25-нд Коннектикут мужийн асрамжийн газарт, хугацаанаас өмнө суллагдсаныхаа дараа хяналтад байх үедээ өөд болсон байна.
Greenwich Time-ийн мэдээлснээр, Смитийн нас барсныг тус мужийн ял эдлүүлэх газрын төлөөлөгч баталжээ. Тэрээр амьдралынхаа 70 гаруй жилийг торны цаана өнгөрүүлсэн байна.
1950 онд хүн амины хэрэгт буруутгагдсан
Смитийг 1950 онд Гринвич дэх Indian Harbor яхтын клубт болсон дээрмийн үеэр шөнийн харуул Гровер Хартыг буудан хөнөөсөн хэрэгт буруутган яллажээ. Харуул 1949 онд амиа алдсан бөгөөд Смит амьдралынхаа эцэс хүртэл уг гэмт хэргийг үйлдээгүй гэж мэдэгдсээр байсан байна.
Анх түүнд цаазын ял оноосон. People-ийн мэдээлснээр, ялыг гүйцэтгэх өдрийг найман удаа товлосон ч бүр удаа хойшлогджээ. 1954 онд цаазын ялыг бүх насаар хорих ялаар сольсон байна.
Гэм буруутай эсэхэд эргэлзээ гарч байжээ
Шүүхийн дараа ч Смитийн гэм буруутай эсэхэд эргэлзээ төрүүлсэн нөхцөлүүд гарч байв. Түүний эсрэг хэрэг голчлон шууд бус нотлох баримтад тулгуурлаж байсан бөгөөд хожим өөр нэг эрэгтэй халдлагад оролцсон хоёр дахь хүн нь өөрөө байсан гэж мэдүүлжээ.
Мөн уг хэргийг шалгаж байсан мөрдөн байцаагчдын нэг нь дараа нь Смитийг хүн амины хэрэг болсон газарт байсан эсэхэд ч итгэлгүй байгаагаа хэлж байсан байна. Гэсэн ч хоригдол шинэ шүүх хурал явуулах эрх авч чадаагүй аж.
Олон арван жилийн хорих хугацаанд Смит хэд хэдэн удаа богино хугацаанд эрх чөлөөтэй болсон. 1967 онд тэр шоронгоос оргосон ч 12 хоногийн дараа баригджээ. Дараа нь хугацаанаас өмнө суллагдсан боловч нөхцөлийг зөрчсөний улмаас дахин хоригдсон байна.
Амьдралынхаа сүүлийн жилүүдийг тэр ахмад настнуудад зориулсан байгууллагад өнгөрүүлсэн ч эрх баригчдын хяналтад хэвээр байжээ.
