Баян-Өлгий аймгийн зарим нутаг дэвсгэрт малын цочмог халдварт өвчний тохиолдол лабораторийн шинжилгээний хариугаар эцэслэн батлагдлаа. Үүнтэй холбогдуулан тус аймгийн Засаг даргын тусгай захирамж гарч, халдварын тархалтыг зогсоох зорилгоор хорио цээрийн хатуу дэглэмийг албан ёсоор тогтоосон байна. Тус аймгийн Засаг даргын тамгын газраас мэдээлснээр, уг хязгаарлалтын арга хэмжээ нь 2026 оны 05 дугаар сарын 25-ны өдрийн 23:00 цагаас эхлэн хэрэгжиж эхэлжээ.
Халдварын голомтыг хумих ажлын хүрээнд Алтай сум болон Өлгий сумын дөрвөн баг, мөн Бугат сумын төвийн 3, 5 дугаар багын нутаг дэвсгэрийг хамруулан тээврийн хэрэгсэл болон иргэдийн зорчих хөдөлгөөнд тодорхой хугацаагаар хязгаарлалт хийхээр шийдвэрлэсэн байна. Одоогийн байдлаар аймгийн Онцгой комисс, Шуурхай штаб болон мал эмнэлгийн мэргэжлийн байгууллагууд хамтран халдварын хүрээг тэлгүй байх, эрсдэлийг бууруулахаар нэгдсэн удирдлагаар ханган ажиллаж байна. Тус шийдвэрийн дагуу голомтын бүсүүдэд дараах тодорхой хязгаарлалт, хамгаалалтын зохицуулалтууд хэрэгжиж эхэллээ:
- Хяналтын постууд: Эрсдэлтэй замуудад тусгай хяналтын цэгүүдийг байгуулан 24 цагийн турш тасралтгүй ажиллуулж байна.
- Шилжилт хөдөлгөөний хяналт: Малын аливаа шилжилт хөдөлгөөнд бүрэн хяналт тавьж, зөвшөөрөлгүй тээвэрлэлтийг зогсоолоо.
- Ариутгал халдваргүйтгэл: Голомтын бүсүүдэд мал эмнэлгийн байгууллагаас халдваргүйжүүлэлтийн ажлыг тусгай зааврын дагуу эрчимжүүлэв.
- Шоу, цэнгүүн хориглох: Хүмүүс олноор цуглах уулзалт, баяр ёслол, олон нийтийг хамарсан арга хэмжээнүүдийг түр хугацаагаар зогсоолоо.
- Үйлдвэрийн зохицуулалт: Тус бүс нутагт үйл ажиллагаа явуулдаг малын мах бэлтгэлийн үйлдвэрүүдийн ажлыг түр зогсоох шийдвэр гаргажээ.
Аймгийн Onцгой комиссын зүгээс нутгийн иргэд болон малчдад хандан сонор сэрэмжтэй байж, дур мэдэн зорчихгүй байхыг онцгойлон сануулж байна. Мөн малын хөдөлгөөн дур мэдэн хийхгүй байх, олон нийтийн сүлжээгээр баталгаагүй сөрөг мэдээлэл тарааж иргэдийг төөрөгдүүлэхгүй байх, мэргэжлийн байгууллагаас өгч буй албан ёсны заавар зөвлөмжийг чанд дагаж мөрдөхийг анхаарууллаа.
