Олон нийтийн цахим сүлжээнд дуучин Эгшиглэн буюу Т.Болортуяагийн хар тамхины хэрэгтэй холбоотой мэдээлэл цацагдаж, иргэдийн дунд багагүй эргэлзээ үүсгээд байна. Иймд холбогдох албаны болон олон талын эх сурвалжуудаас тухайн асуудлын талаар бататган тодруулсан юм.
Хэргийн түүх ба анхан шатны шүүхийн шийдвэр
Тэрбээр 2025 оны хоёрдугаар сард хамтран амьдрагчийнхаа хамт мансууруулах эм, сэтгэцэд нөлөөт бодис хэрэглэж байх үедээ цагдаагийн байгууллагад саатуулагдсан байдаг. Энэхүү хэргийг Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны тойргийн шүүх 2025 оны зургаадугаар сард хянан хэлэлцэж, Т.Болортуяад хоёр жилийн хугацаанд зорчих эрхийг хязгаарлах ял оногдуулжээ.
Дүрэм зөрчсөн тул хорих ялаар өөрчлөв
Гэвч ял эдэлж байх хугацаандаа дуучин Эгшиглэн буюу Т.Болортуяа нь шүүхээс тогтоосон зааг бүсээс удаа дараа гарч, зорчих эрхийг хязгаарлах ялын горимыг зөрчсөн байна. Иймээс Үндэсний их баяр наадмын өмнөхөн шүүхээс түүнд аваад байсан ялын хэлбэрийг чангаруулж, дараах шийдвэрийг гаргажээ.
- Шүүхээс түүний зорчих эрхийг хязгаарлах ялыг 1 жил 4 сарын хорих ял болгон өөрчилсөн байна.
- Тэрбээр өдгөө ШШГЕГ-ын харьяа эмэгтэйчүүдийн нээлттэй хорих байгууллагад шилжин ялаа эдэлж эхэлжээ.
Энэхүү шийдвэр нь ялтан зорчих эрхийг хязгаарлах журмыг удаа дараа зөрчсөн тохиолдолд хорих ялаар өөрчилдөг эрүүгийн хуулийн дагуу гарсан аж. Тэрбээр ийнхүү хорих байгууллагад зохих хугацааны ялаа эдлэхээр болж байна.
