Захын дэргэд төөрсөн охин өөр айлд өссөн байна
Хятадад хоёр настайдаа алга болсон Цуй Нин нэртэй эмэгтэй 35 жилийн дараа төрсөн гэр бүлтэйгээ дахин уулзсан талаар Mothership мэдээлжээ. Одоо 37 настай тэрээр бараг бүх амьдралаа өөрийн алга болсон захын ойролцоо, төрсөн гэр бүлийнхнээсээ холгүй өнгөрүүлснээ хожим мэдсэн байна.
1991 онд Наньнин хотод охины аав ногооны лангуун дээр ажиллаж байхдаа охиноо ойролцоох мухлагаас талх авч ир гэж явуулжээ. Гэвч бяцхан охин зам хөндлөн гарч, хүн ихтэй бөөний зах руу орсон байна.
Тэнд түүнийг хувцас зардаг нэгэн эмэгтэй олж харжээ. Тэрээр хүүхдийн эцэг эхийг хайсан ч хэн ч ирээгүй тул охиныг өөр дээрээ авч, төрсөн хүүхэд шигээ өсгөсөн байна.
ДНК-ийн шинжилгээ төрөл садан болохыг баталжээ
Цуй Ниний аав охиноо хайхаа хэзээ ч зогсоогоогүй ч амьд сэрүүндээ олж чадаагүй байна. Харамсалтай нь тэрээр охин нь өөрөөс нь тун ойрхон амьдарч байсныг мэдэлгүй хорвоог орхижээ.
Харин Цуй Нин өөрөө үрчлэн авсан гэр бүлтэй байсан тул олон жилийн турш гарал үүслийнхээ талаар гүнзгий хайлт хийгээгүй аж. Сүүлд төөрсөн хүмүүс гэр бүлтэйгээ дахин уулзсан тухай түүхүүдийг олноор нь харсны дараа тэрээр өөрийн үндэс угсааг хайхаар шийдсэн байна.
Тэрээр төрөл садан хайх цахим платформд бүртгүүлсэн бөгөөд хэдхэн цагийн дараа төрсөн эгч нь түүнтэй холбоо барьжээ. Дараа нь хийсэн ДНК-ийн шинжилгээ тэдний төрөл болохыг баталсан байна.
Ийнхүү хоёр настайдаа зах дээр төөрсөн охин 35 жилийн дараа өөрийн жинхэнэ гэр бүлийг олж, олон жил үргэлжилсэн хайлт эцэстээ хариугаа өглөө.
