Нийслэлийн Засаг даргын зөвлөлийн хуралдаанаар 2026-2027 оны халаалтын улиралд авч хэрэгжүүлэх арга хэмжээ, өвөлжилтийн бэлтгэл ажлын талаар танилцууллаа. Энэ өвөл нийслэлийн гэр хорооллын хэрэгцээнд зориулан 280 мянган тонн хагас коксон шахмал түлш импортолохоор төлөвлөсөн бөгөөд одоогийн байдлаар агуулахад 28 мянган тоннын нөөц бүрдээд байна.
Шахмал түлшний нөөц ба борлуулалт
Ирэх өвөлжөөний бэлтгэлийг хангах хүрээнд түлшний хангамж, борлуулалтыг дараах байдлаар зохион байгуулна:
- Импортлох түлшний хэмжээ: 280,000 тонн хагас коксон шахмал түлш
- Одоогийн нөөц: Агуулахад 28,000 тонн
- Борлуулалтын сүлжээ: Нийслэлийн хэмжээнд нийт 435 борлуулалтын цэг ажиллуулахаар бэлтгэж байна.
Угаарын хийн эрсдэлээс сэргийлэх чиглэлээр авч буй арга хэмжээ
Өнгөрсөн 2025-2026 оны өвөл нийслэлд 30 иргэн угаарын хийд хордон амь насаа алдсан харамсалтай тоо баримт гарсан тул хотын захиргаанаас иргэдийн аюулгүй байдалд онцгой анхаарахаар болов.
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва холбогдох албан тушаалтнуудад хандан:
“2025-2026 онд шилжих өвөл 30 хүн угаартаж амь насаа алдсан. Энэ бол үнэхээр харамсалтай тоо. Бид жилийн жилд ийм сэтгэл эмзэглүүлэм мэдээ сонсоод байж болохгүй. Тиймээс холбогдох албан тушаалтнууд эрхэлсэн ажилдаа хариуцлагатай хандаж, урьдчилан сэргийлэхэд онцгой анхаараарай. Иргэд угаартаж нас барсан шалтгаан нөхцөлийг дахин судалж, хянаж танилцуулахыг үүрэг болгож байна.” хэмээн сануулж, угаарын хийн хордлогоос сэргийлэх ажлыг чангаруулахыг үүрэг болголоо.
