Улсын Онцгой комисс өнөөдөр буюу 2026.06.03-ны өдөр анхдугаар хуралдаанаа хийж, цаг үеийн тулгамдсан хэд хэдэн асуудлыг хаалттай хэлэлцлээ. Тус хурлаар саяхан уурхайн задгай цооногт унаж, харамсалтайгаар амь эрсэдсэн гурван настай охиныг аврах ажиллагааны эргэн тойрон дахь нөхцөл байдлыг голчлон зөвшилцсөн байна. Хуралдаанаас гарсан албан ёсны шийдвэрүүд болон цаашид авах арга хэмжээний талаар Шадар сайд бөгөөд УОК-ын дарга Н.Номтойбаяр хэвлэл мэдээллийнхэнд дэлгэрэнгүй мэдээлэл өглөө.
Тэрбээр салбарт үүрлэсэн авлига, ашиг сонирхлын зөрчлийг эрс шүүмжилж, хариуцлага алдсан албан тушаалтнуудтай хатуу тэмцэхээ илэрхийлсэн юм. Үүсээд буй нөхцөл байдалд дүгнэлт хийж, төрийн албаны бүх шатанд хариуцлагын тогтолцоог чангатгана гэдгээ тэрбээр мэдэгдлээ. Шадар сайд хэлэхдээ: “Ний нуугүй хэлэхэд энэ хариуцлагагүй байдлын цаана системчлэгдсэн авлигал байдаг юм байна лээ. Ашиг сонирхлын зөрчилтэй маш олон нөхөд өндөр албан тушаал дээр сууж байна. Энэ хүмүүс уул уурхайг шалгах ажлын хэсэгт багтаад явна гэж байхгүй. Бүгдийг нь чөлөөлөх, халах ажлыг би хийнэ. Ийм эмгэнэлтэй, ноцтой үйл явдлын араас нүд аньж, чихээ таглаж хариуцлагагүй байдлаас хэн ч зугтахгүй. Уучлаарай, ямар ч таньдаг хүн байсан надад хамаагүй.” хэмээн хатуу анхаарууллаа.
Хариуцлага алдсан уул уурхайн компаниуд болон холбогдох албаныхныг илрүүлэх зорилгоор улсын хэмжээнд томоохон хяналт шалгалтыг өрнүүлэхээр тогтжээ. Энэхүү шалгалтыг хууль хяналтын болон чиг үүргийн дараах байгууллагууд хамтран хэрэгжүүлэхээр удирдамж гаргасан байна. Үүнд:
- АҮЭБЯ
- БОУАӨЯ
- ЦЕГ
Уг өргөн хүрээний шалгалтын ажиллагааг талийгаач охины ар гэрийнхний албан ёсны зөвшөөрлөөр нэрлэсэн байна. Нөхцөл байдал ямар түвшинд байгаа болон хяналтын тогтолцоо хэрхэн алдагдсаныг Шадар сайд тодотгож хэллээ. Тэрбээр цааш нь “Амиа алдсан охины эцэг, эхийн зөвшөөрөлтэйгээр “Хотулун гүнж” нэртэй АҮЭБЯ, БОУАӨЯ, ЦЕГ-ын хамтарсан хяналт шалгалтын ажиллагааг эхлүүлж байна. Одоогоор улсын хэмжээнд хэчнээн нүх, сүв байна гэж хэлэх боломжгүй байна. Эцсийн дүндээ, дандаа хуурамч бичиг баримт бүрдүүлж, хяналт хариуцлагын тогтолцоо алдагдсан байна” хэмээн мэдэгдсэн юм.
