Netflix-ийн алдарт “Physical: Asia” шоугаар олон улсад танигдсан, БНСУ-ын уламжлалт ширим бөхийн аварга Ким Мин Жэ өнөө шөнө Монгол Улсад хүрэлцэн ирнэ. Тэрбээр долдугаар сарын 15-ны өдрийн 02:45 цагт “Чингис хаан” олон улсын нисэх онгоцны буудалд газардах бөгөөд уулсын дундах Архангай аймгийг зорих юм.
Ким Мин Жэ нь Солонгосын уламжлалт ширим (Ssireum) бөхийн шилдэг тамирчдын нэг бөгөөд спортын хорхойтнуудын дунд “Элсний мангас” (Monster of the Sand Pit) хочоороо алдаршжээ.
Түүний гаргасан амжилтуудаас дурдвал:
- Оюутан аварга: Тэрбээр оюутан байх хугацаандаа улсын аварга болсон анхны цөөн тамирчдын нэгээр нэрлэгдэж байв.
- Үндэсний аварга: 2022 онд ширим бөхийн БНСУ-ын үндэсний аваргын цолыг хүртсэн.
- Олон улсын нэр хүнд: Netflix-ийн “Physical: Asia” шоунд Өмнөд Солонгосын багийн бүрэлдэхүүнд багтан өрсөлдсөнөөр дэлхий даяар олон мянган шүтэн бишрэгчтэй болсон байна.
“ARA POWER CUP” олон улсын тэмцээнд хүч үзнэ
Ким Мин Жэ Монголд зохион байгуулагдаж буй “ARA Festival”-ийн хүрээнд болох олон улсын үндэсний бөхийн “ARA POWER CUP” тэмцээнд оролцохоор ийнхүү эх орныг маань зорин ирж байна. Тус тэмцээн долдугаар сарын 15-наас 19-ний өдрүүдэд Архангай аймагт зохион байгуулагдах юм.
Сүүлийн жилүүдэд Монгол, Солонгосын уламжлалт бөхийн хамтын ажиллагаа эрчимтэй хөгжиж байгаа бөгөөд энэ удаагийн тэмцээнд дараах төрлүүдийн шилдэг төлөөллүүд оролцохоор төлөвлөжээ:
- Монголын үндэсний бөхийн шилдэг хүчтэнүүд,
- БНСУ-ын уламжлалт ширим бөхийн тамирчид,
- Японы мэргэжлийн сүмо бөхийн төлөөлөл.
“ARA POWER CUP” тэмцээн нь хоёр улсын үндэсний бөхийн соёлыг олон улсад сурталчлах, харилцан туршлага солилцох томоохон гүүр болж байна.
