Монгол бөхийн өргөөнд энэ сарын 7-ны өдөр зохион байгуулагдсан Наадмын сорилго барилдааны тавын давааны үеэр таагүй үйл явдал өрнөжээ. Улсын арслан Р.Пүрэвдагва тус даваанд Улсын начин Б.Сосорбарамд өвдөг шороодохдоо цохих үйлдэл гаргаснаар барахгүй, түүнийг дахимаа авахаар ирэхэд нь “Энэ чинь допинг хэрэглэчихсэн байна” хэмээн чангаар хашхирсан байна. Үзэгчдийн анхаарлыг татсан уг ёс зүйгүй үйлдлийг Монголын Үндэсний Бөхийн Холбооны (МҮБХ) Ёс зүй, сахилга хариуцлагын зөвлөлөөр шуурхай хэлэлцэж, түүний барилдах эрхийг таван сарын хугацаагаар хасах шийдвэрийг 2026.06.10-ны өдрийн ээлжит хурлаараа эцэслэн гаргажээ. Тус хурлаар аймгийн арслан Я.Бумбаяр нарын ёс зүйн зөрчлийг мөн хамтад нь хэлэлцэн шийдвэрлэсэн байна.
Өмнөх сануулга ба холбооны дүрмийн заалтууд
Р.Пүрэвдагва арслангийн хувьд өмнө нь ийм төрлийн сануулга авч байсан түүхтэй аж. Тодруулбал, 2024 оны зургаадугаар сард тэрээр өрсөлдөгч бөхтэйгөө зүй бусаар харьцсан, хөлийн цэцийн шаардлагыг удаа дараа биелүүлээгүй гэх үндэслэлээр тус зөвлөлийн хуралдаанд оролцож байжээ. Тухайн үеийн хурлаар түүнийг улсын өндөр цолтой бөх тул бусад бөхчүүд болон үзэгчдэд буруу үлгэр үзүүллээ хэмээн албан ёсоор сануулга өгч байсан бөгөөд бөх маань ч алдаагаа ухамсарлан, дахин ёс зүйн асуудал гаргахгүй гэсэн ам өчиг өгч байсан юм.
Гэвч тэрээр амлалтаа зөрчиж, сорилго барилдааны үеэр давтан алдаа гаргасан тул МҮБХ-ноос хатуу хариуцлага тооцохоор шийдвэрлэсэн байна. Ёс зүйн зөвлөлөөс түүнийг зөвхөн улсын цолтой бөх төдийгүй Архангай аймгийн дэвжээний багш, дасгалжуулагчийн албыг хашдаг тул илүү хариуцлагатай байх ёстойг онцлов. МҮБХ-ны зүгээс Р.Пүрэвдагвад хариуцлага тооцохдоо дараах хууль, дүрмийн заалтуудыг гол үндэслэл болгожээ:
- МҮБХ-ны “Ёс зүйн дүрэм”-ийн 3.4.1 дэх заалт
- МҮБХ-ны “Ёс зүйн дүрэм”-ийн 3.4.6 дахь заалт
Олон нийтийн шүүмжлэлд өгсөн тайлбар
Энэхүү шийдвэрийн дараа олон нийтийн сүлжээнд МҮБХ-г тамирчдаа ялгаварлан үзлээ гэх шүүмжлэл өрнөсөн юм. Иргэд Улсын заан Б.Бат-Өлзий болон Улсын харцага Э.Даш нар муудалцаж асуудал үүсгэхэд ямар нэгэн хариуцлага тооцоогүй байж Р.Пүрэвдагвыг шийтгэв гэх асуудлыг хөнджээ.
Албаны эх сурвалжийн тайлбарласнаар, Улсын арслан Э.Дашийг мөн тус хурлаар хэлэлцэж, сануулга өгөх шийдвэр гаргасан байна. Тэрээр барилдааны үеэр Улсын заан Б.Бат-Өлзийг өөрийг нь дээрээс нь санаатайгаар дарж унасан гэж буруу ойлгож маргалдсан ч, үйл явдлын дараа үзэгчдээс болон Б.Бат-Өлзийгөөс өөрийн хүсэлтээр уучлалт гуйсан бөгөөд анх удаа ёс зүйгүй үйлдэл гаргасан тул ийнхүү сануулах арга хэмжээ авчээ.
