Монгол Улсын сагсан бөмбөгийн шигшээ баг “Nippon Life Cup 2026” тэмцээний хүрээнд Азийн хүчирхэг Японы шигшээ багтай хоёр нөхөрсөг тоглолт хийлээ. Тус тоглолтуудад энэ зун NBA-гийн “Orlando Magic” багийн бүрэлдэхүүнд оролцон “Summer League”-д тоглосон Ш.Энхийн-Од нийт 51 оноо авч, онцгой тоглолт үзүүлсэн юм.
Ш.Энхийн-одын үзүүлсэн үзүүлэлтүүд:
- Эхний тоглолт: 33 оноо, 14 самбараас бөмбөг авалт, 7 оновчтой дамжуулалт
- Хоёр дахь тоглолт: 18 оноо, 10 самбараас бөмбөг авалт, 9 оновчтой дамжуулалт
Японы дасгалжуулагч болон тоглогчийн сэтгэгдэл
Эхний тоглолтын дараа Японы шигшээ багийн ахлах дасгалжуулагч Дайсуке Окетани болон хамгаалан тоглогч Такашима Шинжи нар Монголын багийн лидер Ш.Энхийн-одын ур чадварыг өндрөөр үнэлжээ.
“Бид Ш.Энхийн-Одыг ийм сайн тоглогч гэдгийг мэдээгүй. Түүнийг тухтай тоглуулсан учраас бид хожигдлоо. Хоёр дахь тоглолтод түүн дээр илүү анхаарах болно.”
— Японы шигшээ багийн ахлах дасгалжуулагч Дайсуке Окетани
“Ш.Энхийн-Од том биетэй, бөмбөг аваад эхний алхам нь их хурдан мөн үсрэлттэй шидэлт хийдэг нь түүний давуу тал. Тэр бол манай улсын дээд лигт тийм ч олон харагддаггүй тоглогч.”
— Японы шигшээ багийн тоглогч Такашима Шинжи
