2026 оны хөлбөмбөгийн ДАШТ-ий шөвгийн наймын тоглолтод Английн шигшээ Норвегийг 2:1-ээр хожиж, хагас шигшээд шалгарлаа. Тоглолт АНУ-ын Флорида мужийн Майами хот дахь “Hard Rock” цэнгэлдэх хүрээлэнд болсон бөгөөд үндсэн цаг 1:1-ээр өндөрлөсөн байна.
Норвегийн шигшээгээс Андреас Шельдеруп гоолдсон бол Английн багийн хоёр гоолыг Жуд Беллингем оруулж, дубль хийжээ. Ингэснээр Англи нэмэлт цагт ялалтаа баталгаажуулсан байна.
Өмнөх шатанд Норвеги Бразилыг 2:1-ээр хожиж дуулиан тарьсан бол Англи Мексикийг хүнд тоглолтын эцэст 3:2-оор буулган авсан юм. Хагас шигшээд Английн шигшээ Швейцарийг хожсон Аргентинтай тоглоно.
Холанд: “Бид илүү ихийг хүртэх ёстой байсан”
Тоглолтын дараа Норвегийн довтлогч Эрлинг Холанд хасагдсандаа харамсаж байгаагаа илэрхийлжээ. Түүний хэлснээр, баг нь Английг хожиход тун ойрхон байсан бөгөөд илүү сайн үр дүн хүртэх боломжтой байсан гэж үзэж байна.
Холанд “Одоо хүнд мэдрэмж төрж байна. Бид илүү ихийг хүртэх ёстой байсан мэт санагдаж байна. Английг хожиход маш ойрхон байлаа. Нэг талаас хоосон мэдрэмж байна, нөгөө талаас бахархал ч байна. Бид шөвгийн наймд хүрч, Англид жинхэнэ тулаан үзүүллээ” гэж ярьжээ.
Мөн тэрээр шийдвэрлэх мөчүүдэд гарсан маргаантай шүүлтийн талаар хэлэхдээ, заримдаа дэлхийн аваргын хувь заяаг ганц хоёрхон эпизод шийддэг гэж онцолсон байна. Түүний хэлснээр, Бразилын эсрэг Норвеги тоглолтыг эргүүлж чадсан бөгөөд Англитай хийхийн өмнө боломж 50:50 байсан гэж үзэж байжээ.
2026 оны ДАШТ АНУ, Канад, Мексикт 6-р сарын 11-нээс 7-р сарын 19 хүртэл үргэлжилж байна.
