Хиймэл оюун ухааны (ХОУ) хөгжил хоёр үе шаттайгаар явагдах бөгөөд эхнийх нь гэмт хэрэг дагалдах бол хоёр дахь нь дэлхийд элбэг дэлбэг байдлыг авчирна. Энэ тухай Microsoft компанийг үндэслэгч Билл Гейтс “NBC News” телевизэд өгсөн ярилцлагадаа мэдэгдэв.
“Хиймэл оюун ухаанд хоёр үе шат байх болно. Одоо бидний орж буй эхний үе шатанд асуудлыг шийдвэрлэх боломж байгаа ч одоогоор бүрэн шийдэж чадаагүй байна. Түрээсийн төлбөр өндөр хэвээр, эрүүл мэндийн тусламж үйлчилгээ хэт үнэтэй байна. Хэрэв бидэнд зохих баталгаа, хамгаалалт байхгүй бол ХОУ хөдөлмөрийн зах зээлийг өөрчилж, гэмт хэрэгтнүүдийн боломжийг тэлэх эрсдэлтэй” хэмээн Гейтс ярьжээ.
Түүний хэлснээр, энэ үе шат орчим 20 жил үргэлжлэх бөгөөд энэ хугацаанд хүн төрөлхтөн шинэ технологид дасан зохицох аж.
“Та бүхэн үүнийг даван туулмагц хүн дүрст роботууд болон хиймэл оюун ухааны хослол нь байшин барих, хүнсний ногоо тарих гэх мэт олон зүйлийг хийх боломжийг олгоно. Үүнийг элбэг дэлбэг байдлын эрин үе гэж нэрлэж болно” гэж бизнесмен нэмж хэлэв.
Гейтс хоёр дахь үе шат нь хүн төрөлхтөнд амьдралын утга учрыг олох эсвэл цагаа хэрхэн өнгөрөөх вэ гэх мэт өөр төрлийн асуудлуудыг авчирна гэж нэмж дурджээ. “Үүнийг залуу үеийнхэн өөрсдөө шийдэг” гэж тэрээр санал болгосон байна.
Ярилцлагын үеэр Гейтс мөн хиймэл оюун ухааны хөгжил нь тэрбум хүний амь насыг авч одсон үйл явдалд хүргэж болзошгүйг үгүйсгэсэнгүй. Тэрээр хорон санаатай хүмүүс хиймэл оюун ухааныг ашиглах шиг “тийм аюултай зэвсэг” түүхэнд хэзээ ч байгаагүйг тэмдэглэв. Гейтсийн хэлснээр, хиймэл оюун ухааны чиглэлээр ажилладаг компаниудын өөрийгөө зохицуулах механизм хангалтгүй тул Засгийн газрууд технологийн хөгжилд хяналт тавихад оролцох ёстой аж.
Тэрээр Америкийн эрх баригчдад холбогдох хууль тогтоомжийг баталж, хууль сахиулах байгууллага, политикуудыг хиймэл оюун ухааны баталгаа болон мониторингийн талаарх хэлэлцүүлэгт оролцуулахыг уриалав. Үүний зэрэгцээ хиймэл оюун ухаанд зориулсан олон улсын дүрмийг боловсруулах нь Хүйтэн дайны үеийн цөмийн зэвсгийг хязгаарлахаас илүү төвөгтэй даалгавар болно гэдгийг бизнесмен онцолжээ. Түүний бодлоор энэ асуудалд АНУ-ын манлайлал нэн шаардлагатай байгаа юм.
