Table of Contents
Монгол Улс 2026 оны Дэлхийн дижитал ба хиймэл оюуны өрсөлдөх чадварын үнэлгээнд 52.62 оноо авч, судалгаанд хамрагдсан 70 улсаас 67 дугаар байрт эрэмбэлэгдсэн байна. Олон улсын менежментийн хөгжлийн хүрээлэнгийн (IMD) дэргэдэх Дэлхийн өрсөлдөх чадварын төвөөс гаргасан уг судалгаанд Монгол Улс өмнөх жилийнхтэй ижил байр эзэлжээ.
Тодруулбал, 2025 онд 69 орноос 67 дугаарт жагсаж байсан бол энэ жил судалгаанд хамрагдсан улсын тоо 70 болж нэмэгдсэн ч Монголын эрэмбэ өөрчлөгдөөгүй байна.
Хиймэл оюуны хөгжлийг үнэлгээний аргачлалд өргөн хүрээнд тусгажээ
IMD-ээс өмнө нь Дэлхийн дижитал өрсөлдөх чадварын тайлан нэрээр гаргадаг байсан судалгаагаа 2026 оноос шинэчилж, хиймэл оюуны хөгжил, хэрэглээ болон түүнийг нэвтрүүлэхэд шаардлагатай орчныг илүү өргөн хүрээнд үнэлэх болжээ.
Шинэ аргачлал нь улс орнуудын технологи нэвтрүүлэх боломжийг хэмжихээс гадна дижитал шийдэл, хиймэл оюуныг эдийн засаг, бизнес, төрийн байгууллага болон нийгмийн үйл ажиллагаанд хэр үр дүнтэй ашиглаж байгааг харгалзан үздэг байна.
Энэ жилийн судалгаанд засаглал, технологи ба дэд бүтэц, үр ашиг, ажиллах хүчний хөгжил, үнэт зүйлс гэсэн таван үндсэн бүлгийг хамруулжээ. Эдгээр нь нийт 15 дэд бүлэгтэй бөгөөд 88 шалгуур үзүүлэлтээр улс орнуудын өрсөлдөх чадварыг тодорхойлсон байна.
Үнэлгээнд 51 статистик мэдээлэл, 37 санал асуулгын үзүүлэлтийг ашигласан аж.
Монгол Улс таван үндсэн бүлгийн дөрөвт нь 67 дугаар байр эзэлсэн байна
2026 ОНЫ ҮНЭЛГЭЭ — МОНГОЛ УЛС
- 67/70 – Дэлхийн эрэмбэ
- 52.62 – Нийт оноо
Үндсэн таван бүлгийн үр дүнгээс харахад Монгол Улс ажиллах хүчний хөгжлөөр 62 дугаар байрт эрэмбэлэгдсэн бол бусад дөрвөн бүлэгт 67 дугаар байр эзэлжээ.
| Үнэлгээний үндсэн бүлэг | Эзэлсэн байр |
|---|---|
| Засаглал | 67 |
| Технологи ба дэд бүтэц | 67 |
| Үр ашиг | 67 |
| Ажиллах хүчний хөгжил | 62 |
| Үнэт зүйлс | 67 |
Засаглалын бүлэгт технологи, хиймэл оюуны хариуцлагатай хөгжлийг дэмжих хууль эрх зүй, зохицуулалт болон институцийн орчныг үнэлсэн байна. Харин технологи, дэд бүтцийн бүлэгт санхүүжилт, судалгаа, технологийн суурь нөхцөлийг хамруулжээ.
Үр ашгийн бүлгээр технологийн бодит хэрэглээ, байгууллагын үйл ажиллагаанд үзүүлэх үр дүнг хэмжсэн бол ажиллах хүчний хөгжилд боловсрол, хүний нөөц, ур чадварыг авч үзсэн аж. Үнэт зүйлсийн бүлэгт кибер аюулгүй байдал, хиймэл оюуны ёс зүй, нийгмийн итгэлцэл болон хандлагыг үнэлжээ.
Эмэгтэй судлаачдын үзүүлэлтээр дэлхийд тэргүүлжээ
Монгол Улсын хувьд боловсрол ба сургалтын дэд бүлэг харьцангуй өндөр үнэлгээ авч, 70 орноос 35 дугаарт эрэмбэлэгдсэн байна.
Мөн эмэгтэй судлаачдын үзүүлэлтээр нэгдүгээр байр эзэлсэн нь энэ жилийн үнэлгээний онцлох үр дүн болжээ.
Харин бизнесийн уян хатан байдлын дэд бүлэгт Монгол Улс сүүлчийн буюу 70 дугаар байрт жагссан байна. Түүнчлэн шинжлэх ухааны судалгаатай холбоотой эрх зүйн орчин, оюуны өмчийн хамгаалалт болон кибер аюулгүй байдлын үзүүлэлтүүдэд сул үнэлгээ авсан аж.
Технологийн хэрэглээ, хүний нөөцийн чадавхыг сайжруулах шаардлагатай
Судалгааны үр дүнгээс үзэхэд дижитал болон хиймэл оюуны өрсөлдөх чадварыг нэмэгдүүлэхэд зөвхөн технологийн хүртээмж, дэд бүтцийг өргөжүүлэх нь хангалтгүй байна. Технологийг эдийн засгийн бүтээмж, бизнесийн үр ашиг, төрийн үйлчилгээ болон хүний нөөцийн хөгжилд бодитоор ашиглах нь үнэлгээний чухал хүчин зүйл болжээ.
Монгол Улсын хувьд хиймэл оюуныг төрийн болон хувийн хэвшлийн байгууллагын үйл ажиллагаанд нэвтрүүлэх, судалгаа, хөгжүүлэлтийн хөрөнгө оруулалтыг нэмэгдүүлэх шаардлагатай байгааг тайланд дурдсан байна.
Үүний зэрэгцээ ажиллах хүчний дижитал ур чадварыг хөгжүүлэх, хиймэл оюуны хэрэглээтэй холбоотой эрх зүй, ёс зүйн зохицуулалтыг сайжруулах болон кибер аюулгүй байдлыг бэхжүүлэх чиглэлд анхаарах шаардлагатай гэж үзжээ.
Эх сурвалж: Олон улсын менежментийн хөгжлийн хүрээлэн (IMD), World Digital and AI Ranking 2026
