Монгол Улсын эдийн засаг, нийгмийн хөгжлийг түүчээлэн манлайлж буй 2025 оны “ТОП-100” аж ахуйн нэгжид цом, өргөмжлөл гардуулах хүндэтгэлийн ёслолын ажиллагаа өнөөдөр ёслол төгөлдөр боллоо. Тус арга хэмжээнд Монгол Улсын Ерөнхий сайд Н.Учрал биечлэн оролцож, хөдөлмөр бүтээл, амжилт ололтоороо шалгарсан шилдэг компаниудын хамт олонд баяр хүргэсэн юм. Тэрбээр эх орондоо ажлын байр нэмэгдүүлж, үндэсний үйлдвэрлэл болон эдийн засгийн тусгаар тогтнолыг бэхжүүлэхэд үнэтэй хувь нэмэр оруулж буй баялаг бүтээгчдэдээ гүн талархал илэрхийлэв.
Энэ удаагийн шалгаруулалтад багтсан шилдэг компаниуд улсын төсөвт найман их наяд төгрөгийн татвар төвлөрүүлсэн нь өмнөх оныхоос таван хувиар өссөн үзүүлэлт болжээ. Энэхүү дүн нь манай улсын нийт татварын орлогын 30 хувийг дангаараа бүрдүүлж байгаа төдийгүй эдгээр компаниудад 85 мянган хүн ажиллаж байгаа нь нийт ажиллагсдын 6.1 хувьтай тэнцэж байна. Мөн 2025 онд тэдгээрийн борлуулалтын орлого өмнөх жилээс 10.8 их наяд төгрөгөөр буюу 19.7 хувиар нэмэгдэж, 65.7 их наяд төгрөгт хүрсэн нь дотоодын нийт бүтээгдэхүүний 73 хувийг эзэлж буй хэрэг юм.
Засгийн газраас хувийн хэвшлийг дэмжих, тэдэнд тулгарч буй дарамт шахалтыг арилгах зорилгоор “Чөлөөлье” хэмээх эдийн засгийн чөлөөлөлтийн бодлогыг тууштай хэрэгжүүлж байна. Үүний хүрээнд Бизнесийн эрх чөлөөний тухай анхдагч хууль болон Татварын, Нийгмийн даатгалын ерөнхий хуульд өөрчлөлт оруулах хуулийн төслүүдийг Парламентад өргөн бариад байгаа аж. Ерөнхий сайд Н.Учрал хэлсэн үгэндээ татварын өрнөөс үүдэлтэйгээр данс нь битүүмжлэгдсэн 12,153 аж ахуйн нэгжийн дансыг нээж, 2026 онд эрүүл мэнд, байгаль орчны зайлшгүй төлөвлөгөөт шалгалтаас бусад 7,300 гаруй хяналт шалгалтыг цуцалснаа онцоллоо. Мөн нийслэл хотод худалдаа, үйлчилгээний 146 чиглэлийн бизнесийг дарга нарын зөвшөөрөлгүйгээр, зөвхөн цахим системд мэдэгдээд эрхлэх боломжийг бүрдүүлсэн нь бодит дэвшил болсныг дурдсан юм.
Шинээр өргөн мэдүүлсэн Бизнесийн эрх чөлөөний тухай хуулийн гол үзэл баримтлалыг Гүйцэтгэх засаглалын тэргүүн дараах дөрвөн үндсэн зарчмаар тодорхойлж байна. Үүнд:
- Төрийн зүгээс хувийн хэвшлийн бизнесийн үйл ажиллагааг үндэслэлгүйгээр, дур зоргоороо хязгаарлахгүй байх.
- Төр өөрөө бизнес эрхлэгчидтэй зах зээл дээр өрсөлдөхөөс бүрэн татгалзах.
- Төрийн байгууллагуудад хэдийнэ цугласан мэдээллийг аж ахуйн нэгжүүдээс дахин дахин шаардаж чирэгдүүлэхгүй байх.
- Хувийн өмчийн халдашгүй байдал, хөрөнгө оруулалт, хууль ёсны ашиг сонирхлыг тууштай хамгаалах.
Засгийн газрын тэргүүн төр, хувийн хэвшлийн харилцаанд тодорхой байдлыг бий болгох нь хамгийн чухал гэдгийг тэмдэглэлээ. Тэрбээр “Тогтвортой байдал гэдэг бол тодорхой байдал юм. Төр “гэнэтийн бэлэг” барьж, зохиомол саад босгодоггүй “No surprise” зарчмыг төр, бизнесийн харилцаанд нэвтрүүлнэ” хэмээн мэдэгдсэн юм. Эцэст нь шилдэг 100 компанийн өнөөдрийн гаргасан амжилт нь ирээдүйн үндэсний 1000 шинэ аж ахуйн нэгжийг төрүүлж, Монголын бүтээгдэхүүн, үйлчилгээ дэлхийн зах зээлд өрсөлдөх шинэ боломжийн эхлэл болно гэдэгт итгэж буйгаа илэрхийлэв.
