Хятадын Шанхай хотын Ли овогтой эмэгтэй онлайн худалдааны платформоос дизайнер цүнх худалдан авсны дараа энэ нь жилийн өмнө гэрээс нь алга болсон өөрийнх нь цүнх байсныг мэджээ. Энэ талаар Mothership мэдээлсэн байна.
2025 оны эхээр Ли хязгаарлагдмал тоогоор гарсан дизайнер цүнхийг ойролцоогоор 6,000 ам.доллараар худалдан авчээ. Тэр цүнхээ ердөө нэг удаа хэрэглээд, дараа нь байрныхаа үүдний ойролцоо орхисон байна. Хэдэн сарын дараа цүнх алга болсныг анзаарсан ч өөр газар тавьсан байж магадгүй гэж боджээ.
Онлайн зар дээрээс өөрийн цүнхтэй тун адил загвар олжээ
Нэг өдөр Ли алга болсон цүнхнийхээ тухай найздаа ярьсан байна. Найз нь ижил загварыг интернэтээс хайж үзээд, түүнтэй маш төстэй цүнх худалдах зар олжээ.
Ли сэжигтэй санагдсан ч цүнхийг худалдан авахаар шийдэж, 3,000 ам.доллар төлсөн байна. Илгээмжийг хүлээн авсны дараа тэр энэ нь үнэхээр өөрийнх нь цүнх гэдэгт бүрэн итгэжээ. Учир нь цүнхэн дээрх дугаар алга болсон цүнхнийхтэй яг таарч байсан байна.
Цүнх таван удаа эзэн сольсон байжээ
Эмэгтэй цагдаад хандсаны дараа мөрдөн шалгагчид борлуулалтын түүхийг сэргээж үзжээ. Ингэхэд цүнх алга болсноосоо хойш таван удаа эзэн сольж, Гуанжоу хотод очсон бөгөөд эцэст нь Шанхайд эргэн ирсэн нь тогтоогдсон байна.
Мөрдөн шалгалт Лигийн ойрын найз Чжэн овогтой эмэгтэй рүү чиглэжээ. 2025 оны 2-р сард найз залуугаасаа салсных нь дараа Ли Чжэнийг гэртээ түр амьдрахыг урьсан байна.
Чжэн Лигийн байранд ойролцоогоор дөрвөн сар амьдарч, 6-р сард нүүжээ. Харин түүнийг явснаас ердөө хоёр хоногийн дараа цүнх худалдаанд гарсан байна.
