Монгол Улсад албан ёсны айлчлал хийж буй Австралийн Холбооны Улсын парламентын Төлөөлөгчдийн танхимын дарга Милтон Дик “Чингис хаан” үндэсний музейд зочилжээ. Тэрбээр музейн үзүүллэгийн танхимуудаар явж, Монголын түүх, соёлын өвтэй танилцсан байна.
Милтон Дик Монгол Улсын Их Хурлын дарга С.Бямбацогтын урилгаар манай улсад хүрэлцэн ирээд байгаа юм. Түүний айлчлалын хөтөлбөрт парламент хоорондын хамтын ажиллагаатай холбоотой уулзалтуудаас гадна Монголын түүх, соёлыг танилцуулах арга хэмжээнүүд багтжээ.
Музейн удирдлагууд хүндэтгэн угтав
Австралийн парламентын төлөөлөгчдийн танхимын даргыг Соёл, спорт, аялал жуулчлал, залуучуудын яамны Төрийн нарийн бичгийн дарга Б.Бат-Эрдэнэ болон “Чингис хаан” үндэсний музейн дэд захирал Д.Эрдмаа нар угтан авсан байна. Айлчлалын үеэр зочдод музейн үндсэн үзүүллэгүүдийг танилцуулжээ.
“Чингис хаан” үндэсний музей нь Монголын төр, нүүдэлчдийн түүх, соёлын өвийг олон нийтэд дэлгэн үзүүлдэг томоохон музейн нэг юм. Милтон Дикийн энэ удаагийн зочлол нь түүний Монгол Улсад хийж буй албан ёсны айлчлалын соёлын хөтөлбөрийн нэг хэсэг болж байна.
Хоёр улсын дипломат харилцааны 55 жилийн ой ирэх онд тохионо
Монгол Улс, Австралийн Холбооны Улс дипломат харилцаа тогтоосны 55 жилийн ойг ирэх онд тэмдэглэхээр байна. Энэ хүрээнд хоёр улсын харилцаа, парламент болон бусад салбарын хамтын ажиллагааг өргөжүүлэх асуудал айлчлалын үеэр мөн хөндөгдөж байгаа аж.
