М.Нарантуяа-Нара гишүүний арилжааны сурталчилгаа хууль зөрчиж байгаа тул Ёс зүйн хороо анхааралдаа авах шаардлагатай байна

0 comments 1 үзэлт
М.Нарантуяа-Нара гишүүний арилжааны сурталчилгаа хууль зөрчиж байгаа тул Ёс зүйн хороо анхааралдаа авах шаардлагатай байна

Парламентын гишүүний ёс зүй, хууль дээдлэх зарчимтай холбоотой асуудал олон нийтийн дунд дахин шүүмжлэл дагууллаа. УИХ-ын гишүүн М.Нарантуяа-Нара өөрийн цахим хуудсаар дамжуулан шууд дамжуулалт хийж, хувийн дэлгүүр болон аж ахуйн нэгжийн бараа бүтээгдэхүүнийг тогтмол сурталчилж байгаа нь хууль тогтоомжийн хэд хэдэн заалттай зөрчилдөж байна. Олон нийтийн зүгээс энэхүү үйлдлийг нь шүүмжилж буй ч эрхэм гишүүн цаашид ч шууд дамжуулалтаа үргэлжлүүлнэ хэмээн мэдэгдсээр байгаа тул УИХ-ын Ёс зүйн хороо уг асуудлыг хяналтдаа авч, зохих арга хэмжээг яаралтай авах шаардлага тулгараад байна.

Хууль тогтоомжоор хориглосон ашиг сонирхол ба давхар ажил эрхлэлт

Монгол Улсын Үндсэн хуульд парламентын гишүүний эрх зүйн байдал, ажил эрхлэлтийн хязгаарыг тодорхой заасан байдаг. Тодруулбал, УИХ-ын гишүүн нь Ерөнхий сайд болон Засгийн газрын гишүүний албан тушаалыг л давхар хаших боломжтой бөгөөд үүнээс бусад тохиолдолд гишүүний үндсэн үүрэгт үл хамаарах аливаа ажил эрхлэх, албан тушаал хашихыг хатуу хориглодог. Энэ утгаараа хувийн хэвшлийн бараа бүтээгдэхүүнийг сурталчлах замаар ашиг орлого олох нь Үндсэн хуулийн уг заалттай нийцэхгүй үйлдэл болж байна.

Үүнээс гадна Монгол Улсын Их Хурлын тухай хуульд төрийн түшээдийг гишүүний нэр хүнд, бүрэн эрхээ хувийн ашиг сонирхлын үүднээс ашиглахыг хориглосон хэм хэмжээ үйлчилдэг. Хууль тогтоох дээд байгууллагын гишүүний статус, олон нийтэд хүрэх нөлөөллийг арилжааны сурталчилгаанд ашиглах нь хуулийн дээрх зохицуулалтыг шууд зөрчсөн хэлбэр юм.

Тайлбар ба хариуцлагын механизм

Хууль зүйн энэхүү хязгаарлалтыг зөрчиж буй талаар шүүмжлэл өрнөх бүрд М.Нарантуяа-Нара гишүүн өөрийгөө “хулгай хийгээгүй, тендер аваагүй” гэх үндэслэлээр зөвтгөж иржээ. Гэвч гэмт хэрэг үйлдээгүй байх нь Үндсэн хууль болон УИХ-ын тухай хуулиар хүлээсэн тусгай үүрэг, хориглолтоос чөлөөлөгдөх шалтгаан болохгүй.

Төрийн өндөр албан тушаалтан хууль тогтоомжийг өөрийн үзэмжээр тайлбарлаж, удаа дараа зөрчих нь парламентын нэр хүнд, иргэдийн төрд итгэх итгэлд сөргөөр нөлөөлдөг. Тиймээс удаан хугацаанд үргэлжилж буй энэхүү зөрчлийг таслан зогсоож, хуулийн хэрэгжилтийг хангуулах үүднээс УИХ-ын Ёс зүйн хороо асуудлыг хэлэлцэж, бодит хариуцлага тооцох нь зүйтэй юм.

Танд ч бас таалагдаж магадгүй

Сэтгэгдэл үлдээгээрэй