Монгол Улсын санаачилгаар НҮБ-аас тунхагласан “Дэлхийн адууны өдөр”-ийг тохиолдуулан 2026 оны долоодугаар сарын 11-нээс 13-ны өдрүүдэд эх оронд маань олон улсын хэмжээний өргөн хүрээний баяр наадам, соёлын цуврал арга хэмжээнүүд зохион байгуулагдах гэж байна. Нүүдлийн соёл иргэншил, адууны өв уламжлалыг дэлхий дахинд сурталчлах эл түүхэн үйл явдалд гадаадын 56 орны хүндэт зочид, төлөөлөгчид оролцохоор Монгол Улсад хуран цуглах бөгөөд баярын бэлтгэл ажлууд ид өрнөж байна.
Хүй долоо худагт болох гол үйл явдлууд болон бэлтгэл ажил
Энэхүү томоохон баярын гол зангилаа болон дэлхийн анхаарлыг татах үндсэн хөтөлбөрүүд долоодугаар сарын 13-ны өдөр Улаанбаатар хотын ойролцоох Хүй долоо худагт албан ёсоор өрнөнө. Үзэгч, зочид төлөөлөгчдийн ая тухыг хангах үүднээс инженерийн дэд бүтэц, эрчим хүчний найдвартай хангамж болон орчны тохижилтын ажлыг гүйцэтгэж байгаа бөгөөд баяр наадмын өдрүүдэд дараах онцлох үйл ажиллагаанууд цувралаар зохион байгуулагдах юм.
- 10 мянган морьтны парад: Монгол адууны хүч чадал, уламжлалт морьтны соёлыг харуулсан нүсэр жагсаал.
- Олон улсын хүндэтгэл: Тусгайлан уригдсан 56 орны зочдод зориулсан ёслолын арга хэмжээнүүд.
- Спорт, урлагийн наадам: Адууны соёлтой холбоотой уламжлалт наадгай, эрдэм шинжилгээний хурал болон цуврал тоглолтууд.
НҮБ-ын тогтоол ба “Дэлхийн адууны өдөр”-ийн үүсэл түүх
Монгол Улсын Ерөнхийлөгч Ухнаагийн Хүрэлсүхийн санаачилсан “Дэлхийн адууны өдрийн тухай” тогтоолын төслийг НҮБ-ын Ерөнхий Ассамблейн 79 дүгээр чуулганы 2025 оны зургаадугаар сарын 3-ны өдрийн Бүгд хуралдаанаар хэлэлцэн, санал нэгтэйгээр баталж байсан түүхтэй. Уг тогтоолд дэлхийн 56 орон хамтран зохиогчоор нэгдсэн бөгөөд адууны хүн төрөлхтний соёл иргэншил, ахуй амьдралд оруулсан түүхэн хувь нэмрийг өндрөөр үнэлсэн байдаг. Ийнхүү жил бүрийн 7 дугаар сарын 11-ний өдрийг олон улсад адууны өв соёл, бэлчээр болон нүүдлийн аж ахуйн өвөрмөц хэв маягийг хамгаалах, хадгалан үлдээх уриалга дор тэмдэглэж байхаар тогтсон билээ.
