Table of Contents
Уильям Шекспирийн алдарт “Ромео, Жульетта” жүжгийн Ромеогийн дүрийг Монголын театрын тайзнаа 150 гаруй удаа амилуулж, үзэгчдийн сэтгэлд “Монголын Ромео” хэмээн хоногшсон Монгол Улсын Гавьяат жүжигчин Очирбатын Гэрэлсүх өнөөдөр 52 нас хүрч байна. Хүүхэд насны мөрөөдлөөсөө эхлэн соёл, урлагийн салбарт 30 гаруй жил тууштай хөдөлмөрлөсөн тэрээр тайз, дэлгэцийн олон арван шилдэг бүтээлээрээ олон нийтийн хүндэтгэлийг хүлээсэн нэрт уран бүтээлч билээ.
Хүүхдийн ордноос эхэлсэн урлагийн замнал
О.Гэрэлсүх 1974 оны наймдугаар сарын 18-нд Улаанбаатар хотод төржээ. Тэрээр бага наснаасаа жүжигчин болох хүсэлдээ хөтлөгдөн, Монголын хүүхдийн ордны драмын дугуйланд багш С.Даваахүүгийн удирдлага дор хичээллэж эхэлсэн байна. Сонирхолтой нь, тухайн үед түүнтэй хамт Төрийн соёрхолт найруулагч Н.Наранбаатар, Гавьяат жүжигчин Л.Баттулга (Аглуу), Ш.Доржсүрэн (Дооёо) нарын хожим урлагийн салбарт нэрээ дуурсгасан олон авьяаслаг залуус суралцаж байжээ.
Ердөө 14 настай байхдаа “Амьдралын нахиа” кинонд тоглож анхны алхмаа хийсэн тэрээр Соёл урлагийн их сургуулийг жүжигчний мэргэжлээр төгсөхөөсөө өмнө “Монгол кино” үйлдвэр болон Үндэсний радио телевизэд ассистент найруулагчаар ажиллаж, уран бүтээлийн туршлагаа баяжуулжээ.
150 удаа амилуулсан “Монголын Ромео” ба тайзны ур чадвар
О.Гэрэлсүхийн нэрийг Монголын театрын урлагтай холбоход хамгийн түрүүнд санаанд ордог дүр бол Ромео юм. Тэрээр 1996 онд Улсын академик драмын театрын тайзнаа жүжигчин И.Одончимэгийн (Жульетта) хамт гарч ирсэн бөгөөд уг дүрийг 150 гаруй удаа тайзнаа тоглосон нь түүний карьерын онцгой хуудас болсон юм.
Тэрээр зөвхөн романтик дүрээр хязгаарлагдалгүй С.Жаргалсайханы “Хаан түүх”, О.Нилийн “Тамын дурлал”, Дариа Фогийн “Чөлөөт хос”, Э.Оюуны “Би эндээс явахгүй” зэрэг 20 гаруй драмын жүжигт эерэг, сөрөг, инээдмийн дүрүүдийг чадварлаг бүтээсний дээр “Замын хүн” жүжгийг өөрөө найруулан тавьж байв.
Дэлгэцийн бүтээлүүд ба төрийн үнэлгээ
Театрын тайзнаас гадна дэлгэцийн 40 гаруй уран бүтээлд гол ба туслах дүр бүтээсэн түүнийг үзэгчид “Ларьдма”, “ТюТю”, “Модон могой”, “Төлөөс”, “Мамма Миа” кинонууд болон “Боловсрол” телевизийн “Шинжээч” олон ангит киноны гол дүрээр нь сайн мэдэх билээ.
Урлагийн салбарт оруулсан үнэтэй хувь нэмрийг нь үнэлж түүнд 2021 онд “Алтан гадас” одон олгосон бол 2025 оны хоёрдугаар сарын 27-ны өдөр Монгол Улсын Ерөнхийлөгчийн зарлигаар Монгол Улсын Гавьяат жүжигчин хүндэт цолыг хүртээсэн юм.
