Нийслэлийн Иргэдийн Төлөөлөгчдийн Хурлын Vll хуралдаанаар хотын ахмад настнуудад чиглэсэн нэгэн чухал шийдвэрийг гаргаж, Нийслэлд ахмадын амралт сувиллын төв ОНӨААТҮГ-ыг байгуулах тогтоолын төслийг албан ёсоор баталлаа. Тус байгууллага үйл ажиллагаагаа эхлүүлснээр өндөр настнуудын нийгмийн оролцоог хангах, тэднийг идэвхтэй амьдралын хэв маягт хөтлөх, ганцаардлаас сэргийлэхэд томоохон түлхэц болох юм. Мөн байнгын асаргаа, сувилгаа нэн шаардлагатай байгаа ахмадуудад эмнэлгийн болон мэргэжлийн тусламж үйлчилгээг цаг алдалгүй, чанартай хүргэх үндсэн нөхцөл бүрдэж байна.
Шинээр бий болж буй энэхүү төв нь ахмадуудын бие бялдар болон сэтгэл зүйн эрүүл мэндийг цогцоор нь дэмжих урт хугацааны зорилготой аж. Түүнчлэн настнуудад дараах чиглэлээр тав тухтай орчныг бүрдүүлж, төрөлжсөн үйлчилгээнүүдийг үзүүлэхээр төлөвлөсөн байна:
- Нийгмийн халамж болон нарийн мэргэжлийн эрүүл мэндийн цогц тусламж үйлчилгээг үзүүлэх;
- Ахмад настнуудын тав тухыг дээд зэргээр хангасан амралт, сувиллын тусгай орчныг бүрдүүлэх;
- Нийгмээс тусгаарлагдах хандлагыг бууруулах зорилготой олон нийтийн соёл, танин мэдэхүйн ажлуудыг зохион байгуулах.
Үүнээс гадна, өнгөрсөн дөрөвдүгээр сард Ажиа Гэгээн Лувсантүвдан өөрийн тэргүүлдэг “Энэрэл нигүүсэл оюун билгийн төв” ТББ-аар дамжуулан Хан-Уул дүүргийн 21 дүгээр хороонд баригдсан Ахмадын амралт, сувиллын төвийн барилгыг бүрэн ашиглалтад оруулсан байдаг. Тэрбээр уг барилга байгууламжийн бүтээн байгуулалтыг өөрийн 100 хувийн хөрөнгөөр санхүүжүүлж, нийслэлийн өмчид ямар нэгэн үнэ төлбөргүйгээр хүлээлгэн өгсөн юм. Ийнхүү бэлэн болсон барилгын суурь дээр Улаанбаатар хот бие даасан ОНӨААТҮГ байгуулж, үйл ажиллагааг нь албан ёсоор эхлүүлэхээр эрх зүйн шийдвэрээ ийнхүү баталгаажууллаа.
