Аргентин улсын Сан Хуан хотноо зохион байгуулагдсан “Ралли Рейд”-ийн дэлхийн аваргын цувралын гуравдугаар гараа болох “Desafio Ruta 40” уралдаан амжилттай өндөрлөлөө. Түүхт 13 дахь удаагийн эл нэр хүндтэй раллид дэлхийн шилдэг мотоциклийн 78 баг, автомашины 38 баг хурд хүч, тэсвэр хатуужлаа сорин өрсөлдсөн юм. Тус тэмцээнд манай улсаас “Тал нутгаас Дакарт” төслийн тамирчин, ОУХМ Б.Батмөнх болон “КТМ Монголиа”-гийн тамирчин, ОУХМ П.Мөрөн нар эх орноо төлөөлөн амжилттай уралдлаа.
П.Мөрөний түүхэн ялалт ба аваргын цом
2026 оны “Дакар ралли”-д уралдаж байсан хашир туршлагатай мастер П.Мөрөн энэ удаагийн дэлхийн аваргын тайзнаа Монгол хүний ур чадварыг гайхуулж, авто-мото спортын түүхэнд нэгэн шинэ хуудсыг нээлээ. Түүний гаргасан гайхалтай амжилтуудыг дурдвал:
- Зургаан гараа дараалан түрүүлсэн: Тэрбээр мотоциклийн Ралли3 (Rally3) ангилалдаа уралдсан бүхий л шатанд өрсөлдөгчдөө хол хаяж, зургаан гарааны турш тасралтгүй магнайлсан байна.
- Нийлбэр дүнгээр тэргүүлсэн: Цуврал уралдааны эцсийн нийлбэр дүнгээр тэрбээр тасархай тэргүүлж, хүндтэй аваргын цомыг өргөлөө.
Ингэснээр П.Мөрөн нь FIM Дэлхийн аваргын цувралд түрүүлсэн анхны Монгол хүн болж, эх орныхоо нэрийг дэлхийн тавцанд цурайтуулав.
Б.Батмөнхийн уралдааны үр дүн
“Тал нутгаас Дакарт” төслийн тамирчин Б.Батмөнхийн хувьд ДАШТ-ий гуравдугаар гарааны таван өдрийн турш үргэлжилсэн ширүүн уралдааныг амжилттай дуусгалаа. Түүний үзүүлсэн техникийн үзүүлэлт болон үр дүн:
- Тэмцээний нийт мотоциклийн тамирчдаас 27 дугаар байрт хурдалсан.
- Өөрийн уралдсан Ралли2 (Rally2) ангилалдаа 17 дугаар байр эзэлсэн.
- Уг уралдаанаас 12 оноо авсан бөгөөд үүний улмаас 2027 оны “Дакар ралли”-д оролцох эрхээ албан ёсоор хасуулсан байна.
