Монгол Улсын Засгийн газрын ээлжит бус хуралдаан 2026 оны тавдугаар сарын 18-ны өдөр болж, хэрэглээний бүтээгдэхүүний хангамжийг тогтворжуулах чухал тогтоол баталлаа. Тодруулбал, “Үнийн өсөлтийн эсрэг авч хэрэгжүүлэх зарим арга хэмжээний тухай” тогтоолын хүрээнд хүн амын хүнсний гол хэрэгцээ болох нөөцийн махны хүртээмжийг сайжруулж, борлуулалтын цэгүүдэд хийх хяналтыг чангатгахаар шийдвэрлэсэн байна. Уг шийдвэрийн дагуу зах зээл дэх нийлүүлэлтийг тасалдуулахгүй байх, хууль бус дамлан худалдаалалтыг таслан зогсоох чиглэлээр холбогдох албаныханд тодорхой үүрэг даалгавар өгчээ.
Шинээр батлагдсан тогтоолын дагуу нөөцийн махны борлуулалтыг эрчимжүүлэх, ил тод байдлыг хангах арга хэмжээнүүдийг авна. Үүний тулд холбогдох байгууллагууд хяналт шалгалтын ажлыг дараах чиглэлээр үе шаттай зохион байгуулахаар тогтсон байна:
- Нөөцийн махны борлуулагдаагүй үлдэгдлийг 2026 оны тав, зургадугаар сард багтаан зах зээлд бүрэн нийлүүлэх;
- Нэг хүнд болон аж ахуйн нэгжид их хэмжээгээр, давтамжтай худалдсан зөрчлийг яаралтай шалгаж, дутсан махыг бэлтгэн нийлүүлэгчдээр нөхөн бүрдүүлүүлэх;
- Цахим төлбөрийн баримт буюу И-баримт үүсгэлгүйгээр худалдаалсан махны хэмжээгээр орон нутгаас нөхөн татан авалт хийж, энэ сарын 25-ны дотор багтаан зах зээлд гаргах;
- Мах бэлтгэл, хадгалалт, түгээлтийн бүх шатанд цахим баримтын системийг бүрэн нэвтрүүлж, дамжлагын тогтолцоог халах.
Хүнсний тухай хуулийн заалтаар аймаг, нийслэлийн Засаг дарга нар стратегийн хүнсний хангамжийг хариуцах үүрэг хүлээдэг учраас ирэх жилүүдэд хомсдол үүсгэхгүйн тулд 2027 оны нөөцийн хэмжээг эртнээс төлөвлөхийг Засгийн газраас даалгав. Түүнчлэн нийслэлийн хүн амд зориулсан нэг мянга 400 тонн махны үнийн зөрүү болон нэмэлт зардлыг батлагдсан төсөвтөө зохицуулалт хийж шийдвэрлэхийг Хүнс, хөдөө аж ахуй, хөнгөн үйлдвэрийн сайд Ц.Идэрбатад, санхүүжилтийг шуурхай олгохыг Сангийн сайд З.Мэндсайхан нарт үүрэг болгожээ. Энэхүү ажлын үр дүнгийн талаар ХХААХҮ-ийн сайд Ц.Идэрбат мэдээлэл өгөхдөө “Нөөцийн мах худалдаалах хугацааг 15 хоногоор сунгаж 2026 оны долдугаар сарын 1 болголоо. Мөн нөөцийн махыг анх гэрээнд тусгасан үнээр буюу 13-15 мянган төгрөгөөр борлуулна” хэмээн онцлон тэмдэглэсэн юм. Цаашид стратегийн хүнсийг үйлдвэрлэгчээс хэрэглэгчид шууд хүргэх замаар зуучлагчдын зохиомол үнийн хөөсрөлтийг бүрмөсөн халахаар төлөвлөж байна.
