АНУ-д нэгэн айлын гэрээс хүнд нөхцөлд амьдарч байсан 16 хүүхэд олдсон хэрэгт мөрдөн шалгах ажиллагаа үргэлжилж байна. WOWK-ийн мэдээлснээр, мөрдөгчид хүүхдүүдийн амьдралын нөхцөл, гэр бүлийн өнгөрсөн үе болон дөрвөн жилийн өмнө болсон эмгэнэлт явдлыг нарийвчлан шалгаж байгаа аж.
Хүүхдүүд нэг нас хагасаас 18 насны хооронд байсан бөгөөд тэдний дунд гурван ихэр хос байжээ. Мөрдөн шалгах байгууллагын мэдээллээр, хүүхдүүдийн хэн нь ч сургуульд явж байгаагүй, зарим нь бүр ярьж ч чаддаггүй байсан байна.
Тусгаарлагдсан, ариун цэврийн шаардлага хангахгүй орчинд өссөн нь хүүхдүүдийн хөгжилд ноцтой саатал үүсгэсэн гэж мэргэжилтнүүд үзэж байна. Одоогоор бүх хүүхэд эрх баригчдын хамгаалалтад байгаа бөгөөд тэдэнд учирсан хохирлын хэмжээг тогтоохоор ажиллаж байна.
Гэр бүлийн өнгөрсөнд эмгэнэлт явдал байжээ
Мөрдөн шалгалтаар хүүхдүүдийн эх Элизабет Сайдерс 2022 онд дутуу төрсөн сиамын ихэр охид төрүүлсэн ч тэд амьд үлдээгүй нь тогтоогджээ. Охид жирэмсний 24 дэх долоо хоногт төрсөн бөгөөд эмч нар тэднийг аварч чадаагүй байна.
Элизабет болон түүний нөхөр Гэри нар олдсон бүх хүүхдийн төрсөн эцэг эх мөн эсэх нь одоогоор бүрэн тодорхойгүй байна. Тэд 2008 онд гэрлэсэн бөгөөд тухайн үед Элизабет 15, Гэри 18 настай байжээ. Анхны хүүхэд нь хуримаас хоёр сарын дараа төрсөн нь тэдний харилцаа түүнээс өмнө эхэлсэн байж болзошгүйг харуулж байна.
Гэр бүлийн нэгэн хамаатан тэдний гэрт юу болж байсныг огт мэдээгүй гэж ярьжээ. Тэрээр олон жилийн өмнө хоёр, гурван хүүхэд л харж байсан бөгөөд тэнд 16 хүүхэд амьдарч байсныг төсөөлөөгүй гэжээ. Хэрэв нөхцөл байдал ийм аймшигтай байсныг мэдсэн бол хүүхдүүдийг авч явах эсвэл тусламж үзүүлэх байсан гэж тэр харамсан хэлсэн байна.
Одоогоор Сайдерсын хос мөрдөн шалгалтад хамрагдаж байна. Хөршүүд болон танилууд болсон явдалд цочирдож, олон хүүхэдтэй гэр бүлүүдэд тавих хяналтыг чангатгахыг олон нийт шаардаж эхэлжээ. Ойрын хугацаанд болох шүүх хуралдаанаар эцэг эх болон хамгаалалтад авсан хүүхдүүдийн цаашдын хувь заяаг шийдэх төлөвтэй байна.
