“Steppe Warrior” буюу “Тал нутгийн дайчин” хочоороо олон улсын тавцанд танигдсан холимог тулаанч Батбаярын Намсрай Монголын спортын түүхэнд нэгэн шинэ хуудсыг нээлээ. Тэрбээр Азийн шилдэг тулаанчдыг шилж авдаг “Road to UFC” тэмцээний дөрөвдүгээр улиралд гайхалтай ялалт байгуулж, дэлхийн хамгийн нэр хүндтэй холбоотой албан ёсны гэрээ байгуулсан манай улсын гурав дахь тамирчин болсон түүхэн амжилтын эзэн юм.
МҮОХ-ны удирдлагууд түүхэн амжилт гаргасан шинэ цагийн тулаанчийг өөрийн байрандаа урьж, тусгайлан хүндэтгэл үзүүллээ. Энэхүү албан ёсны уулзалтад холимог тулааны спорт болон олимпын хорооны дараах төлөөлөгчид өргөн бүрэлдэхүүнтэйгээр оролцсон байна.
- ОУОХ-ны гишүүн, МҮОХ-ны ерөнхийлөгч Б.Баттүшиг болон МҮОХ-ны дэд ерөнхийлөгч Ц.Гантулга.
- “Сторм” клубийн дасгалжуулагч, Монголын анхны “UFC” тулаанч Д.Батгэрэл.
- Багийн менежер Г.Хүрэлбадарч болон “YES Mongolia” ТББ-ын ерөнхий нарийн бичгийн дарга Э.Төрбаяр.
Санал солилцсон сэдэв болон “Олимпын Алдар” одон
Уулзалтын үеэр талууд холимог тулааны спортын өнөөгийн хөгжлийн чиг хандлага болон цаашид “UFC”-ийн тэмцээнүүдэд Монгол тамирчдын оролцоог хэрхэн нэмэгдүүлэх боломжийн талаар нээлттэй санал солилцсон байна. МҮОХ-ны ерөнхийлөгч Б.Баттүшиг манай тамирчдын олон улсын тавцанд гаргаж буй амжилтыг өндрөөр үнэлж, цаашид тус спортыг хөгжүүлэх чиглэлд бодлогын түвшинд дэмжин ажиллахаа илэрхийллээ.
Арга хэмжээний төгсгөлд олон улсад гаргасан жинтэй амжилт, Монголын холимог тулааны спортын хөгжилд оруулж буй хувь нэмрийг нь үнэлэх ёслол болов. Үүний хүрээнд Б.Намсрай болон түүний баг бүрэлдэхүүнийг Монголын үндэсний олимпын хорооны “Олимпын Алдар” одонгоор шагнаж, дурсгалын бэлэг гардуулан баяр хүргэсэн юм.
