Богдхан уулын дархан цаазат газрын ойн санг хамгаалах, хөнөөлт хортон шавжийн тархалтыг таслан зогсоох зорилгоор агаараас авиамикробиологийн аргаар тэмцэх ажил өрнөж байна. Тусгай зориулалтын энэхүү цогц ажлыг 2026 оны зургаадугаар сарын 9-нөөс 10-ны өдрүүдэд багтаан Залаатын ам болон Хүрэл тогоотын бүс нутгийг хамруулан зохион байгуулж байгаа юм. Нийтдээ 2,000 га талбайг хамарсан энэхүү арга хэмжээ нь ойн экосистемийн эрүүл мэндийг хамгаалах, байгалийн тэнцвэрт байдлыг хадгалахад онцгой ач холбогдолтой ажээ.
Засгийн газрын хэрэгжүүлэгч агентлаг Ойн газрын захиалгаар хэрэгжүүлж буй уг ажилтай холбогдуулан мэргэжлийн байгууллагуудаас иргэдийн эрүүл мэндийг хамгаалах үүднээс тусгайлан сэрэмжлүүлэг гаргалаа. Шавьж устгалын бодис цацсан бүс нутагт ойрын өдрүүдэд зорчих нь хүний биед сөрөг нөлөө үзүүлэх эрсдэлтэй тул аялагч, алхагчдыг дараах зөвлөмжийг чанд мөрдөхийг уриалж байна.
- Хугацааны хязгаарлалт: Ойд чөлөөт цагаа өнгөрөөх, зугаалах үйлдлийг ирэх 10-14 хоногийн турш бүрэн зогсоох.
- Алхалт хийхгүй байх: Дурдсан хоногуудад Залаатын ам болон Хүрэл тогоот орчимд явган алхалт хийхээс татгалзах.
- Спортын үйл ажиллагаа: Агаарт тархсан бодисын нөлөөлөл бүрэн арилах хүртэл тухайн орчинд гүйх, спортоор хичээллэхгүй байх.
