Шинэ Каирын эрүүгийн хэргийн шүүх синтетик мансууруулах бодис үйлдвэрлэж, борлуулсан хэрэгт телевизийн хөтлөгч Сара Халифа болон өөр 11 хүнд цаазаар авах ял оноожээ. Энэ талаар Egypt Telegraph мэдээлэв.
Хэргийн өөр есөн холбогдогчид бүх насаар нь хорих ял оноож, тус бүр 100 000 египет фунт буюу 7 050 050 монгол төгрөгийн торгууль ногдуулсан байна. Харин зургаан шүүгдэгчийг цагаатгажээ.
Мөрдөн шалгах байгууллагын мэдээлснээр, яллагдагчид синтетик мансууруулах бодис үйлдвэрлэх түүхий эд нийлүүлэх, мансууруулах бодис үйлдвэрлэх, хадгалах, тээвэрлэх, борлуулах үйл ажиллагаа явуулдаг зохион байгуулалттай бүлэглэлд багтдаг байжээ.
Мөрдөн шалгах ажиллагааны хүрээнд хууль сахиулах байгууллагууд 750 кг-аас дээш хэмжээний мансууруулах бодис болон түүнийг үйлдвэрлэх түүхий эд хураан авсан байна. Мөн мөрдөн шалгах байгууллагын үзэж буйгаар тус бүлэглэлийн үйл ажиллагаанд ашиглаж байсан тоног төхөөрөмж, автомашин, гар утас болон бэлэн мөнгийг хураан авчээ.
Мансууруулах бодистой холбоотой уг хэргийн мөрдөн шалгах ажиллагаа Халифаг 2025 оны дөрөвдүгээр сард баривчилсны дараа эхэлсэн байна. Прокурорын байгууллагын мэдээлснээр, телевизийн хөтлөгч зохион байгуулалттай гэмт бүлэглэлд удирдах үүрэг гүйцэтгэж байжээ.
Египетийн хууль эрх зүйн тогтолцоонд хэд хэдэн төрлийн онц хүнд гэмт хэрэгт цаазаар авах ял хэвээр үйлчилдэг. Шашин, эрх зүйн дүгнэлт боловсруулдаг төрийн байгууллага болох Египетийн фетвагийн газар Dar al-Ifta-гийн тайлбарласнаар, цаазаар авах ял оноох эцсийн шийдвэрийг шүүх гаргадаг бөгөөд муфтий ял оногдуулах ажиллагаанд оролцдог байна.
Шүүх цаазаар авах ялыг баталгаажуулахын өмнө шашин, эрх зүйн дүгнэлт гаргуулахаар хэргийн материалыг Египетийн муфтийд хүргүүлдэг. Гэхдээ муфтийн дүгнэлт нь шүүхийн хувьд заавал дагаж мөрдөх шинжтэй биш юм. Dar al-Ifta мөн Египетэд цаазаар авах ялыг дүүжлэх аргаар гүйцэтгэдэг гэж мэдээлжээ.
