АНУ-ын Холбооны прокурорын газраас Монтана муж улс дахь засгийн газрын лабораторийн хоёр эрдэмтнийг албан ёсоор буруутган, хэрэг үүсгэжээ. Тэднийг аюултай вирус хилээр хууль бусаар нэвтрүүлэхийг завдсан, мөн гаалийн ажилтнуудад худал мэдээлэл өгсөн хэрэгт сэжиглэж байгаа аж. Энэ талаар АНУ-ын Хууль зүйн яамны мэдээллээс иш татан Politico хэвлэл мэдээлэв.
Диагностикийн төхөөрөмж нэртэй 113 хуруу шил
Хэрэгт буруутгагдаад буй хүмүүс нь Нидерландын иргэн Винсент Мюнстер (Vincent Munster) болон түүний Камерун улсаас гаралтай хамтрагч Клод Кве (Claude Kwe) нар юм. Эдгээр мэргэжилтнүүд нь төрийн хатуу стандартын дагуу аюултай эмгэг төрүүлэгч бичил биетүүдтэй ажилладаг байна. Тэд 1 дүгээр сард Бүгд Найрамдах Конго Улсын нийслэлээс Детройт хотын нисэх онгоцны буудалд ирэхдээ гартаа том хар чемодан барьж явжээ.
Гаалийн ажилтнуудын мэдээлснээр, эрдэмтэд чемоданы агуулгыг “оношилгооны төхөөрөмж” хэмээн худал хэлсэн байна. Шалгалтын явцад хууль сахиулагчид нийт 113 ширхэг хуруу шил олжээ. Тэдгээрээс 20 дээжийг сонгон шинжлэхэд 17-гоос нь сармагчны цэцэг (mpox) вирус илэрсэн байна. Уг вирус нь 2022 онд АНУ-ын 42 иргэний аминд хүрч байсан аюултай патоген юм.
Тав хүртэлх жилийн хорих ял
Прокурорын газраас тэдгээр шинжээчдийг халдварт өвчний дэгдэлт гарсан бүс нутгаас иргэний агаарын тээврийн онгоцоор биологийн материалыг тээвэрлэсэн болохыг онцлон тэмдэглэв. Тэдэнд тав хүртэлх жилийн хорих ял оноох эрсдэлтэй байна.
АНУ-ын Үндэсний эрүүл мэндийн хүрээлэнгээс тэдний эсрэг хүний нөөцийн арга хэмжээ авсан бөгөөд мөрдөн байцаалтын ажиллагаатай бүрэн хамтран ажиллаж байгаагаа мэдэгдээд, олон нийтэд ямар нэгэн аюул заналхийлэл байхгүй гэж тодотгожээ.
