Люксембургт “Носферату” хэмээн нэрлэгддэг том хэмжээтэй аалзнууд өргөн тархаж эхэлсэн талаар Luxembourg Times мэдээлжээ. Энэ хоч нь аалзны нуруун дээрх дүрс цус сорогч гүн Орлокийн төрхийг санагдуулдагтай холбоотой юм.
Эдгээр нь Zoropsis spinimana гэх Газар дундын тэнгисийн бүсийн аалз бөгөөд 2000-аад оноос хойш хойд зүг рүү идэвхтэй тархаж байна. Судлаачдын үзэж буйгаар үүнд дэлхийн дулаарал гол нөлөө үзүүлжээ.
Люксембургт энэ зүйлийн анхны төлөөлөгчийг 2020 онд Дюделанж хотын орчимд бүртгэсэн байна. Түүнээс хойш iNaturalist.lu платформд нутгийн иргэдийн авсан зураг тогтмол нэмэгдэх болжээ. Одоо найман сантиметр хүртэл хэмжээтэй эдгээр аалз жижиг улсын олон хэсэгт ажиглагдаж байна.
Хүнд аюултай эсэх
“Носферату” аалзнууд ихэнх аалз шиг тор нэхэж олзоо барьдаггүй. Тэд шөнийн цагаар идэвхтэй ан хийдэг тул заримдаа айл гэрт орж ирдэг. Том биетэй, хүчтэй эрүүтэй харагддаг учраас хүмүүсийн дунд айдас төрүүлэх нь элбэг байна.
Гэсэн ч биологич Александр Вайгандын хэлснээр, энэ аалз хүн төрөлхтөнд ноцтой аюул учруулахгүй. Хазуулсан тохиолдолд зөгий эсвэл хэдгэнэд хатгуулсантай төстэй мэдрэмж төрж болох ч эрүүл хүнд аюултай гэж үзэх үндэслэл байхгүй аж. Тэрээр өөрийн мэдэхээр ийм аалзанд хазуулж ноцтой хохирсон хүн байхгүй гэж онцолжээ.
Арахнологичдын хувьд энэ үзэгдэл өмнөд бүсийн амьтад шинэ орчинд хэр хурдан дасан зохицож байгааг харуулсан тод жишээ болж байна. Уур амьсгал өөрчлөгдөхийн хэрээр дулаан бүсийн зүйлүүд Европын илүү хойд нутгуудад суурьших боломжтой болжээ.
2 comments
Ийм мэдээ уншихаар жаахан аймаар юм
Байгаль цаг уур их өөрчлөгдөж байх шиг