“Гэртээ ганцаараа” киноны од, 46 настай Маколей Калкин болон түүний сүйт бүсгүй, 38 настай жүжигчин Бренда Сонг нар “Эмми” шагнал гардуулах ажиллагааны улаан хивсний ёслолын үеэр гэр бүлийн байдлаа хөгжилтэй байдлаар тодорхойлсон тухай “Us Magazine” мэдээллээ.
Зурагчин тэдний зургийг авахдаа тэднийг эхнэр, нөхөр хэмээн андуурч “Ноён, хатагтай Калкин” хэмээн дуудахад Бренда Сонг засан: “Хараахан амжаагүй ээ! Удахгүй!” хэмээн инээмсэглэжээ. Харин Калкин тоглоом болгон “Хэрэв би азтай бол хэзээ нэгэн цагт болох байх!” хэмээн хариулсан байна. Ёслолын үеэр тэд бие биетэйгээ зохицсон хар болон саарал өнгийн дэгжин хувцастай оролцжээ.
Хамтын амьдрал ба хуримын төлөвлөгөө
Хосууд 2014 онд анх танилцаж, 2017 оноос дотносон 2022 онд сүй тавьсан юм. Тэд хоёр хүүтэй бөгөөд ууган хүү Дакота нь 2021 онд (Калкины 2008 онд зам тээврийн ослоор нас барсан эгчийн нэрээр нэрлэсэн), бага хүү Карсон нь 2022 онд төрсөн байна.
Сүй тавьсан хэдий ч хосууд хурим хийх гэж яарахгүй байгаа аж. Өмнө нь тэд чимээгүйхэн оргож хуримлах тухай ярилцаж байсан ч Сонгын ээж том баяр хийхийг хүсдэг тул боломжгүй гэж тоглож байв. Калкины тайлбарласнаар хамтдаа ирээдүйгээ нэгэнт шийдсэн тул заавал хуримын тавцан руу яаран очих шаардлагагүй гэж үзэж байгаа юм.
