Монгол Улсын Ерөнхий сайд Н.Учрал “MIMC 2026” Олон улсын математикийн олимпиадыг эх орондоо анх удаа амжилттай зохион байгуулж, түүхэн амжилт үзүүлсэн багш, сурагчдын төлөөллийг хүлээн авч уулзан баяр хүргэлээ. Уулзалтын үеэр Ерөнхий сайд олимпиадыг зохион байгуулахтай холбогдон гарсан санхүүгийн асуудлыг Засгийн газар болон Ерөнхий сайдын хувьд бүрэн шийдвэрлэж өгөхөө мэдэгдсэн байна.
“MIMC 2026” олимпиадын онцлох амжилт ба шийдвэрүүд
2026 оны долоодугаар сарын 22–27-ны өдрүүдэд Улаанбаатар хотноо зохион байгуулагдсан тус олимпиадын талаарх онцлох мэдээллүүдийг тоймбол:
- Санхүүгийн асуудлыг шийдвэрлэв: Олимпиад зохион байгуулах хорооны дарга Б.Идэржавхлан багшийн санхүүгийн хүндрэлээс үүдэн зуслангийн байшингаа зарах гэж байсан асуудлыг Засгийн газар бүрэн хариуцаж, зардлыг нөхөн олгохоор болов.
- Багийн түүхэн амжилт: Дэлхийн 32 орны 600 гаруй сурагч, нийт 1,100 гаруй төлөөлөгч оролцсон тус олимпиадаас Монголын сурагчид 2 алт, 9 мөнгө, 22 хүрэл медаль хүртэж, нийлбэр дүнгээрээ багийн 2-р байрт шалгарчээ.
- Орон нутгийн оролцоо: Тус олимпиадад Монгол Улсын 21 аймгийн сурагчдыг бүрэн хамруулснаар орон нутгийн хүүхэд багачуудад дэлхийн олимпиадад өрсөлдөх итгэл, урам зориг өгсөн юм.
- Эдийн засгийн үр өгөөж: Олимпиадын үеэр соёл ахуйгаа сурталчлахаас гадна нислэг, зочлох үйлчилгээ зэрэг зардлын хүрээнд Монгол Улсад ойролцоогоор 8 тэрбум төгрөгийн бодит хөрөнгө оруулалт үлджээ.
- Сайн дурын ажилтнуудад өгсөн урилга: Олимпиадад зохион байгуулагчаар ажилласан сайн дурын сурагчдыг ирэх наймдугаар сард болох “COP17” НҮБ-ын олон улсын бага хуралд ажиллахыг Ерөнхий сайд урилаа.
“Та бүхэн дэлхийд Монгол Улсынхаа нэрийг гаргаж амжилт үзүүлж, эх орноо сурталчлан таниулсан. Б.Идэржавхлан багш та зуслангийн байшингаа зарах шаардлагагүй. Засгийн газар боловсролыг онцгойлон дэмжинэ. Олимпиадын хүрээнд гарсан санхүүгийн асуудлыг Ерөнхий сайдын хувьд бүрэн шийдвэрлэж өгнө.” — Монгол Улсын Ерөнхий сайд Н.Учрал
