Монгол Улсын Ерөнхийлөгч У.Хүрэлсүхийн ивээл дор уламжлал болгон зохион байгуулдаг “Сувилагч тандаа баярлалаа-2026” улсын зөвлөгөөн өнөөдөр Төрийн ордонд боллоо. Олон улсын сувилагчдын өдрийг тохиолдуулан “Цогц чадамж-Сувилагчийн үнэ цэн” уриан дор зохион байгуулж буй тус хурлаар сувилахуйн салбарын ололт амжилт, тулгамдсан асуудлыг хэлэлцэв.
Төрийн тэргүүн зөвлөгөөний индрээс нийт сувилагч нарт баяр хүргэж, цар тахлын хүнд жилүүдэд иргэдийн амь насыг авран хамгаалахад гаргасан тэдний асар их хүчин зүтгэлийг ард түмний нэрийн өмнөөс өндрөөр үнэлж буйгаа илэрхийллээ. Тэрээр “Эрүүл монгол хүн” үндэсний хөдөлгөөнийг амжилттай хэрэгжүүлэхэд сувилагчдын манлайлал, мэргэжлийн ур чадвар шийдвэрлэх үүрэгтэйг онцлон тэмдэглэв.
Салбарын хэмжээнд хийгдэж буй томоохон ажлууд болон хүний нөөцийн нөхцөл байдлыг тоймловол:
- Дэд бүтэц: Сувилагчдыг мэргэшүүлэх, эрдэм шинжилгээний ажил хийх боломжоор хангах “Сувилахуйн сургалт, судалгааны төв” удахгүй ашиглалтад орох бөгөөд хангайн бүсэд ижил төрлийн цогцолборыг байгуулаад байна.
- Цалин хөлс: Энэ онд эрүүл мэндийн салбарынхны цалинг 75 хувь хүртэл нэмэхээр төлөвлөснөөс одоогоор 30 хувь нэмэгдээд байгаа бөгөөд энэ сараас нэмэгдлийг олгож эхэлжээ.
- Хүний нөөцийн дутагдал: Манай улсад 15 мянга гаруй сувилагч ажиллаж байгаа нь салбарын ажиллах хүчний 22 хувийг эзэлж байна. Гэвч 1,000 хүнд ногдох сувилагчийн тоо 4.2 байгаа нь олон улсын дунджаас 2-3 дахин цөөн үзүүлэлт юм.
Эрүүл мэндийн сайд Э.Батшугар сувилагчдын ажиллах орчин, нийгмийн баталгааг сайжруулах бодлогыг тууштай хэрэгжүүлэхээ илэрхийллээ. Зөвлөгөөний үеэр сувилахуйн салбарт олон жил үр бүтээлтэй ажилласан Монголын сувилагчдын нийгэмлэгийн тэргүүн Д.Нямсүрэнд Эрүүлийг хамгаалахын гавьяат ажилтан цол хүртээж, зарим тэргүүний ажилтнуудыг төрийн дээд одон, медалиар шагнасан юм.
