УИХ-ын гишүүн асан Г.Уянга болон Г.Баасан нарыг найруулагч Б.Баатартай холбоотой мэдээлэл түгээснийх нь төлөө бус, “Номын баяр”-ын үеэр гарсан үйлдлүүдтэй нь холбоотойгоор зөрчлийн хэрэг нээн шалгаж байгаа талаар мэдээлжээ.
Тэднийг зөвшөөрсөн зорилгоос өөр шинжтэй үйл ажиллагаа явуулсан, арга хэмжээний хэвийн үйл ажиллагаанд саад учруулсан, мөн оролцогчийн биед халдсан байж болзошгүй гэх үндэслэлээр шалгаж байгаа аж.
Б.Баатартай холбоотой мэдээллийн дараа хардлага үүссэн
Найруулагч Б.Баатарыг “хүмүүсийг үзэл бодлоор нь дайсагнуулах, эвдрэлцүүлэх үйлдлийг зохион байгуулсан” гэх үндэслэлээр яллагдагчаар татаж, цагдан хорьсон талаар Г.Уянга анх мэдээлж, ажлын байрнаас нь шууд дамжуулалт хийсэн байдаг.
Үүний дараа Г.Уянга өөрийн цахим хуудсандаа түүнд зөрчлийн хэрэг нээсэн талаар бичсэн нь Б.Баатартай холбоотой мэдээлэл түгээсэнтэй нь холбоотой байж болзошгүй гэх хардлагыг олон нийтийн дунд үүсгэсэн байна.
“Номын баяр”-ын үеэр болсон үйл явдлыг шалгаж байгаа аж
Намрын 40 дэх удаагийн “Номын баяр” 2026 оны есдүгээр сарын 18–20-нд Сүхбаатарын талбайд болсон. Энэ үеэр Г.Уянга, Г.Баасан нарын нэр бүхий иргэд Монгол Улсын Ерөнхийлөгч болон Ерөнхий сайд Н.Учралын зураг ашиглан эсэргүүцлийн шинжтэй үйл ажиллагаа явуулж, энэ талаарх мэдээллээ цахим сүлжээгээр түгээжээ.
Мөн арга хэмжээний үеэр оролцогчдын нэгний биед халдсан гэх мэдээлэл байгаа бөгөөд уг үйлдлийг холбогдох байгууллага шалгаж байгаа аж.
Иймд Г.Уянга, Г.Баасан нарыг “Номын баяр”-тай холбоотой дээрх нөхцөлүүдээр зөрчлийн хэрэгт шалгаж байгаа бөгөөд эцсийн шийдвэр гараагүй байна.
