Монголын 3х3 сагсан бөмбөгийн шигшээ Казахстаны багийг буулган авлаа

Азийн наадмын 3х3 сагсан бөмбөгийн эрэгтэйчүүдийн төрөлд өрсөлдөж буй Монголын шигшээ баг хэсгийн эхний ялалтаа байгууллаа. Манай баг Казахстаны шигшээг 13:8-ын харьцаатай хожиж, тэмцээний хүснэгт дэх үзүүлэлтээ нэг хожил, нэг хожигдол болгосон байна.

Г.Болор-Эрдэнэ зургаан оноо авлаа

Казахстантай хийсэн тоглолтод Г.Болор-Эрдэнэ Монголын багаас хамгийн олон буюу зургаан оноо авчээ. Харин Г.Балжинням таван оноо нэмэхийн зэрэгцээ гурван самбар, хоёр хаалт гүйцэтгэж, багийн ялалтад чухал хувь нэмэр оруулсан байна.

Монголын шигшээ тоглолтын турш онооны давуу байдлаа хадгалж, өрсөлдөгчөө таван онооны зөрүүтэй буулган авлаа. Энэ нь манай багийн хэсгийн шатанд байгуулсан анхны хожил болов.

Нэг хожил, нэг хожигдолтой болоод буй Монголын баг хэсгийн шатны дараагийн бөгөөд сүүлийн тоглолтоо есдүгээр сарын 23-нд хийнэ. Тэд энэ удаа Шри Ланкийн шигшээ багтай талбайд гарах юм.