Харвардын Анагаах ухааны сургуулийн эрдэмтэд алдартай уран бүтээлчдийн шинэ цомог гарах өдрүүд болон АНУ-ын зам дээрх ослын тоо нэмэгдэх үзэгдлийн хооронд холбоо байж болзошгүйг илрүүлжээ. Энэ талаар Британийн The Times сонин мэдээлсэн байна.
Судалгаанд дурдсанаар, томоохон хөгжмийн цомгууд гарсан өдрүүдэд стримингээр хөгжим сонсох хэмжээ огцом өсдөг аж. Эрдэмтэд үүнийг жолооч нарын ухаалаг утас ашиглалтын нэг үзүүлэлт гэж авч үзжээ.
Хөгжим сонсолт 40%, ослын нас баралт 15% өссөн байна
“Үйл явдлын өгөгдөлд хийсэн шинжилгээгээр бид хөгжмийн стриминг буюу ухаалаг утас ашиглалтын үзүүлэлт нэр хүндтэй хөгжмийн цомог гарах өдрүүдэд бараг 40%-иар огцом өсдөг болохыг тогтоосон. Харин АНУ-д тухайн өдрүүдэд зам тээврийн ослын улмаас нас барах тохиолдол бараг 15%-иар нэмэгддэг” гэж судалгаанд дурджээ.
Эрдэмтэд хэд хэдэн алдартай уран бүтээлчийн цомгийн сонсолтын тоог АНУ дахь нас барсан хүний тоотой зам тээврийн ослын мэдээлэлтэй харьцуулсан байна.
Тэдний дүгнэлтээр, Америкийн поп дуучин Тейлор Свифт, Канадын рэпер Дрейк, АНУ-ын рэпер Кендрик Ламар, Канье Уэст, мөн Британийн дуучин, жүжигчин Харри Стайлс нарын шинэ бүтээл гарах өдрүүдэд зарим жолооч чанга хөгжим болон утсандаа илүү анхаарч, осолд өртөх эрсдэл нэмэгддэг байж болзошгүй аж.
Асуудал нь цомог бус, жолооны үеийн анхаарал сарнилтад байна
Судалгааны зохиогчдын тайлбарласнаар, ийм статистик нь цомог өөрөө осол үүсгэж байна гэсэн үг биш юм. Харин замын хөдөлгөөний дүрэм зөрчих, жолоо барьж байхдаа замаас анхаарал сарних, хөгжим сонсохдоо бүх анхаарлаа түүнд төвлөрүүлэх эсвэл ухаалаг утсаа ашиглах зэрэг хүний үйлдэлтэй холбоотой гэж үзэж байна.
Өөрөөр хэлбэл, алдартай шинэ цомог гарах өдөр жолооч нар хөгжмөө асаах, утсаа шалгах, стриминг апп ашиглах зэрэг үйлдэл хийх нь нэмэгдэж, улмаар зам дээрх эрсдэл өсдөг байж болзошгүйг судалгаанд онцолжээ.
