Жүжигчин Жорж Клуни Холливуд дахь идэвхтэй карьераасаа алхам алхмаар хөндийрч, кино зураг авалт болон найруулгаас илүүтэй буяны үйлс, олон нийтийн санаачилгад анхаарлаа хандуулахаар шийджээ.
Өдгөө 64 настай жүжигчин Нью-Йоркт болсон “Chaplin Award Gala” арга хэмжээний үеэр кино салбар дахь оролцоогоо багасгах төлөвлөгөөгөө анх удаа олон нийтэд нээлттэй мэдэгдсэн байна. Клуни мэргэжлийн түвшинд бусдад ямар нэгэн зүйл батлах шаардлагагүй болсноо хүлээн зөвшөөрчээ. Түүний анхаарал карьерын амбицаас илүүтэй амьдралын утга учир руу шилжиж байгаа аж. “Page Six” хэвлэлийн мэдээлснээр, энэхүү эргэлт нь кино салбарынхны хувьд ч гэнэтийн шийдвэр байлаа.
“Би одоо карьер хөөхөө больсон учраас зөвхөн өөртөө таашаал өгөх зүйлсийг хийх болно” гэж жүжигчин хуваалцжээ.
Ёслолын үеэр Клуни алдар нэрд хандах өөрийн хандлагын талаар ч ярьсан байна. Олон нийтийн магтаал түүнд баяр баясалаас илүүтэй ичимхий мэдрэмж төрүүлдэг аж. Тэрээр туслах дүр болон телевизийн төслүүдээс эхэлсэн урт удаан замналаа эргэн дурслаа. Тухайн үед “Скорая помощь” (ER) цуврал нь түүний хувьд карьерынх нь том эргэлт болж байсан юм. Харин одоо тэрээр өөрт нь юу хамгийн чухал болохыг дахин тунгааж байна.
“Мэдээж, хэрэв үнэхээр сайн дүр гарч ирвэл би татгалзахгүй” гэж тэрээр нэмж хэлэв.
Дахиж кинонд тоглохгүй гэж эрс шийдээгүй ч Клунигийн хувьд кино урлаг амьдралынх нь гол зорилго байхаа больжээ. Тэрээр гол анхаарлаа 2016 онд эхнэр Амалийн хамт байгуулсан “Clooney Foundation for Justice” сандаа хандуулах юм байна. Мөн Лос-Анжелес хотын кино, телевизийн чиглэлийн залууст боловсролын дэмжлэг үзүүлэхээр төлөвлөж байгаа ажээ.
