Америкийн Converse брэнд aespa хамтлагийн гишүүн Карина оролцсон шинэ сурталчилгаагаа цахим сувгуудаасаа устгажээ. Сурталчилгааны зураг арьс өнгөөр ялгаварлан гадуурхахтай холбоотой түүхэн дүрслэлийг санагдуулсан гэх шүүмжлэл олон нийтийн сүлжээнд өрнөсний дараа компани уучлалт хүссэн байна.
Карина уг зурагт Converse-ийн Chuck 70 X загварын пүүзийг сурталчилж, урт цагаан банзалтайгаар нэг гартаа хар өнгийн хоёр пүүз барьсан байжээ. Харин зургийн гэрэл, сүүдэр болон хувцасны хэлбэрийг зарим хэрэглэгч өөр утгаар хүлээн авсан байна.
KKK-тай төстэй дүрслэл харагдсан гэж шүүмжилжээ
Цахим хэрэглэгчдийн нэг хэсэг Каринагийн цагаан хувцас, сүүдрийн нийлэмж нь АНУ-ын Ku Klux Klan (KKK) байгууллагатай холбогддог үзүүртэй цагаан өмсгөлийг санагдуулсан гэж үзжээ. Түүнчлэн түүний гартаа доош унжуулан барьсан хар пүүзнүүдийн байрлал дүүжлэгдсэн хүний хөлийг дүрсэлсэн мэт харагдаж байна гэсэн шүүмжлэл гарсан байна.
KKK нь АНУ-ын түүхэнд цагаан арьстны давамгайллын үзэл, хар арьстнууд болон бусад цөөнхийн эсрэг ялгаварлан гадуурхалт, хүчирхийлэлтэй холбогдож ирсэн байгууллага юм. Тиймээс сурталчилгааны дүрслэл ийм түүхэн бэлгэдэлтэй санамсаргүй давхцсан байж болзошгүй гэх асуудал маргаан дагуулжээ.
Converse зургийг устгасны дараа уучлалт хүссэн байна
Шүүмжлэл эрчимжсэний дараа Converse тухайн сурталчилгааг цахим сувгуудаасаа татаж, олон нийтээс уучлалт хүссэн гэж CNN мэдээлжээ. Компани уг дүрслэлээр арьс өнгөөр ялгаварласан санаа илэрхийлэх зорилго агуулаагүй байсан гэсэн байр суурь илэрхийлсэн байна.
АНУ-ын иргэний эрхийн өмгөөлөгч Ли Меррит компанийн уучлалт хангалтгүй гэж үзэж, ийм төрлийн дүрслэлийг сурталчилгаа нийтлэгдэхээс өмнөх хяналтын шатанд анзаарах ёстой байсан хэмээн шүүмжилжээ. Харин зарим хэрэглэгч зургийг зориудаар расист агуулгатай бүтээсэн гэх нотолгоо байхгүй, харааны санамсаргүй давхцал байж болохыг онцолсон байна.
Ийнхүү нэг сурталчилгааны зураг өөр өөр түүхэн болон соёлын утгаар тайлбарлагдсанаар Converse кампанит ажлаа зогсооход хүрчээ. Маргаан нь олон улсын брэндүүд сурталчилгааны дүрслэлээ соёл, түүхийн өргөн хүрээнд урьдчилан нягтлах шаардлагын талаар дахин хэлэлцүүлэг өрнүүлсэн байна.
