Дэлхийн малчдын чуулга уулзалтын хүрээнд говийн бүсийн малчдын хэлэлцүүлэг өнөөдөр Говьсүмбэр аймагт эхэллээ. Тус хэлэлцүүлэгт 18 орны 26 төлөөлөгч, Говийн бүсийн аймгуудын 35 малчин оролцож, нийт 60 гаруй хүн бэлчээр, мал аж ахуй, байгаль орчны асуудлаар санал солилцож байна.
Монголын говийн малчдын хувьд эрс тэс уур амьсгалтай нөхцөлд бэлчээрийн нөөцийг зохистой ашиглах, мал сүргээ улирлын онцлогт тохируулан маллах нь нүүдлийн мал аж ахуйн тогтвортой байдлын үндэс болдог. Тиймээс хэлэлцүүлгийн үеэр говийн малчид бэлчээрийн ургамлын онцлог, хуурай уур амьсгалд дасан зохицох арга ухаан, мал сүргийн онцлог болон нүүдлийн соёлын уламжлалаа олон улсын төлөөлөгчдөд танилцуулжээ.
Хэлэлцүүлгээр хөндсөн гол чиглэлүүд:
- цөлжилтөөс сэргийлэх арга зам;
- бэлчээрийн тогтвортой менежмент;
- уур амьсгалын өөрчлөлтөд дасан зохицох туршлага;
- нүүдлийн мал аж ахуйн уламжлалт мэдлэг;
- байгаль орчин, мал сүргээ хамгаалах хамтын шийдэл.
Мөн олон орны малчид өөр өөр бүс нутагт хэрэгжүүлж буй сайн туршлага, шинэлэг арга барилаа хуваалцаж байна. Ингэснээр оролцогчид зөвхөн өөрсдийн мэдлэгээ түгээхээс гадна бусдын туршлагаас суралцаж, нутаг орондоо хэрэгжүүлэх боломжийг эрэлхийлж байгаа аж.
Монголын говийн малчдын олон зуун жилийн турш хуримтлуулсан байгальтай зохицон амьдрах ухаан, мал маллагааны уламжлалт арга барил олон улсын малчдын мэдлэг, туршлагатай нэг дор огтлолцож буйгаараа энэ уулзалт онцлог болж байна. Оролцогчдын үзэж буйгаар хэлэлцүүлэг нь цөлжилт, уур амьсгалын өөрчлөлт, нүүдлийн мал аж ахуйн ирээдүйн талаар хамтын шийдэл боловсруулах чухал боломж юм.
