Япон Улсад албан ёсны айлчлал хийж буй Монгол Улсын Ерөнхий сайд Н.Учрал 2026 оны есдүгээр сарын 28-ны өдөр “Айчи Нагояа-2026” Азийн наадамд оролцож байгаа эх орныхоо баг тамирчидтай уулзлаа. Энэ үеэр тэрбээр тив, дэлхийн дэвжээнд эх орныхоо далбааг мандуулж буй тамирчдад тэмцээний өндөр амжилт хүссэн юм.
Медалийн салхийг хагалсан амжилт ба урам зориг
Тус наадамд манай улсаас спортын 31 төрөлд 300 орчим тамирчин хурд хүч, авьяас чадвараа сорин өрсөлдөж байна. Тэднээс дугуйн спортын олон улсын хэмжээний мастер Сайнбаярын Жамбалжамц хүрэл медаль хүртэж, багийнхаа медалийн салхийг хагалсныг Ерөнхий сайд онцолж, баяр хүргэв.
Түүнчлэн ард иргэдийнхээ итгэл, уухайн түрлэгээр урам авч, дараагийн уралдаан, тэмцээнүүддээ улам их амжилт гаргахыг баг тамирчдаасаа хүсэж байгаагаа илэрхийллээ.
Спортын салбарын цалин ба олимпын бэлтгэлийг 2027 оны төсөвт тусгав
Засгийн газраас спортын салбар болон тамирчдаа тууштай дэмжиж ажиллахаа уулзалтын үеэр мэдэгдсэн юм. Энэ хүрээнд салбарын ажилтнууд болон Үндэсний шигшээ багийн дасгалжуулагч, тамирчдын цалинг нэмэгдүүлэхээр шийдвэрлэжээ.
Мөн ирээдүйн “Лос-Анжелес” олимп, паралимпын наадамд бэлтгэх үйл ажиллагааны зардлыг өсгөхөөр 2027 оны улсын төсвийн төсөлд тусгаад байгааг Ерөнхий сайд онцоллоо.
2 comments
Бэлтгэлээ сайн хийсэн бол амжилт заавал ирнэ ээ.
Эх орныхоо нэрийг өндөрт өргөөд ирээрэй, дэмжиж байгаа шүү