УИХ-ын Төрийн байгуулалтын байнгын хорооны хуралдаанаар “Их Монгол Улс байгуулагдсаны 820 жилийн ойг тохиолдуулан Их Эзэн Чингис хааны төрт ёсны өв уламжлалыг дээдлэн мөнхжүүлэх тухай” тогтоолын төслийг хэлэлцэж, чуулганы нэгдсэн хуралдаанд оруулахаар дэмжлээ. Энэ хүрээнд Их Эзэн Чингис хааны эш хөргийг согтууруулах ундаа болон тамхины шошго, сав баглаа боодолд ашиглахыг хориглох зарчмын зөрүүтэй саналыг хуралдаанд оролцсон гишүүдийн 70.6 хувь нь дэмжсэн байна.
Согтууруулах ундааны хэрэглээнээс нэр хүндийг ангид байлгах санал
Хэлэлцүүлгийн үеэр УИХ-ын гишүүн Л.Гантөмөр төрийн тэргүүний зарлигаар монгол айл өрх, албан байгууллага бүр Эзэн Богд Чингис хааны эш хөргийг эрхэмлэн залж, дээдлэн шүтэх болсныг сануулав. Иймээс хааны эш хөрөг болон нэр алдрыг архи, тамхины төрлийн бараа бүтээгдэхүүний шошгод хэрэглэхийг бүрэн хориглох шаардлагатай гэсэн санал гаргасан юм. Уг санал Байнгын хорооны хуралдаанд оролцсон 17 гишүүний 12-ын саналаар дэмжигдэн төсөлд нэмэгдэхээр боллоо.
Мөн тогтоолын төсөлд Их Эзэн Чингис хааны нэрээр нэрлэгдсэн бусад бараа бүтээгдэхүүний онцгой албан татварын тодорхой хувиар санхүүжих тусгай сан байгуулах тухай тусгажээ. Энэхүү сангаар дамжуулан их хааны нэр төр, Их Монгол Улсын түүх соёлыг олон улсад болон дотоодод судлах, сурталчлах үйл ажиллагааг санхүүжүүлэх саналыг Засгийн газар боловсруулахаар тусгасан байна.
Түүхэн тэгш ой, хүндэтгэлийн хуралдаан ба ховор сурвалж бичиг
Их Эзэн Чингис хаан мэндэлсний 864 жил, Их Монгол Улс байгуулагдсаны 820 жилийн ойг тохиолдуулан арваннэгдүгээр сарын 10-нд буюу өвлийн тэргүүн сарын шинийн 1-ний Монгол бахархлын өдөр УИХ-ын хүндэтгэлийн хуралдааныг Төрийн ордонд зохион байгуулахаар болсон байна. Түүнчлэн УИХ-ын дарга С.Бямбацогт гадаадад хадгалагдаж буй түүхэн өвийг эх орондоо авчрах ажлын хүрээнд БНСУ-д хадгалагдаж буй Тогоонтөмөр хааны үеийн хууль цаазын бичгийн цор ганц эх хувийг энэ сард багтаан Монгол Улсад авчирч, “Чингис хааны музей”-д дэлгэн үзүүлэхээр бэлтгэж буйг мэдээллээ.
Их хааны суу алдар, түүхэн өв уламжлалыг сахин хамгаалах уг бодлогын шийдвэр нь үндэсний үнэт зүйлсийг арилжааны хяналтгүй хэрэглээнээс ангид байлгах, соёлын өвийг зохистойгоор хүндэтгэн дээдлэх төрийн дархлааг бэхжүүлэхэд чухал алхам болж байна. Цаашид түүхэн дурсгалт баримтуудыг эх орондоо төвлөрүүлж, боловсрол, судалгааны зориулалтаар хойч үедээ өвлүүлэх нь үндэсний бахархал, нийгмийн эв нэгдлийг бэхжүүлэх бодит хөшүүрэг болох юм.
