Table of Contents
Зүрхний эрүүл мэнд зөвхөн биеийн тамирын дасгал хөдөлгөөнөөс гадна гал тогооны өрөөнд өдөр тутам байдаг энгийн хүнсний бүтээгдэхүүнээс эхэлдэг. Зүрхний эмч нар хоолны дэглэмдээ тогтмол оруулах шаардлагатай хүнсний ногоонуудыг нэрлэжээ.
Олон төрлийн ногоог тогтмол хэрэглэхийн ач тус
Хүнсний ногоо нь зүрхний эрүүл мэндийг дэмжих гол үндэс хэвээр байгаа бөгөөд зүрхний эмч нар ямар нэгэн тодорхой нэг ногоо биш, харин тогтмол бөгөөд олон нэр төрлийн ногоо хэрэглэх нь хамгийн их ашиг тустайг онцолж байна. “Хоол хүнс бол анагаах ухаан” (Food is Medicine) хүрээлэнгийн захирал Дариуш Мозаффарян болон зүрхний мэс засалч, эмч Дипак Вивек нар ийм байр суурьтай байна. Энэ талаар martha stewart хэвлэл мэдээллээ.
Шинжээчдийн хэлснээр, зарим хүнсний ногоо нь цусны даралтыг тогтворжуулах, цусны эргэлтийг сайжруулах, холестерины түвшинг хянахад тусадаг бодисуудыг ихээр агуулдаг тул зөвлөмжид хамгийн олон удаа багтдаг байна.
Зүрхийг тэтгэгч шилдэг хүнсний ногоонууд
- Навчит ногоонууд: Жагсаалтын эхний байруудын нэгийг навчит ногоо эзэлдэг. Бууцай, кале капуста болон бусад төстэй ногоонууд нь нитрат, магни, кали болон витамин К-оор баялаг юм. Нитратууд нь бие махбодод азотын ислийг ялгаруулахад тусалдаг бөгөөд энэ нэгдэл нь судас өргөсгөж, үйл ажиллагааг нь сайжруулдаг болохыг мэргэжилтнүүд тайлбарлаж байна. Үүнээс гадна навчит ногоо нь эслэг болон антиоксидантын эх үүсвэр болдог бөгөөд тухайлбал, бууцай нь уусдаг эслэг агуулдаг аж.
- Хүрэн манжин: Зүрхэнд тустай бүтээгдэхүүнүүдэд зүрхний эмч нар хүрэн манжинг мөн багтаажээ. Түүнийг цусны урсгалыг сайжруулж, даралтыг хэвийн хэмжээнд барихад тусалдаг нитрат болон антиоксидантын өндөр агууламжтайг нь үнэлдэг байна.
- Улаан лооль: Зөвлөсөн ногоонуудын дунд улаан лооль ч бий. Улаан лооль нь исэлдэлтийн стрессийг бууруулахад тусалдаг ликопин агуулдгаараа онцлог юм. Мэргэжилтнүүд улаан лоолийг дулааны аргаар боловсруулсны (болгосны) дараа бие махбод энэхүү бодисыг илүү үр дүнтэйгээр шингээж авдаг болохыг анхааруулж байна.
- Брокколи ба Брюссель капуста: Эдгээр заарт цэцэгт ургамлын төрлийн ногоонууд нь холестериныг эрүүл түвшинд барихад тустай эслэг, антиоксидант болон ургамлын нэгдлүүдийг агуулдаг. Брюссель капуста нь нэмэлтээр ургамлын стерол агуулдаг болохыг эмч нар онцолжээ.
Бусад тод өнгөтэй ногоонууд: Зүрхний эмч нар чинжүү, хаш, хулуу, өргөст хэмх, мөн чидун жимс болон авокадог орхигдуулахгүй байхыг зөвлөж байна. Эдгээр нь зүрх судасны системийг дэмждэг эслэг, антиоксидант, ургамлын нэгдлүүдээр баялаг юм.
Шим тэжээл ба хоол бэлтгэх арга
Мэргэжилтнүүд зүрхний эрүүл мэндэд нитрат, эслэг, кали, магни, антиоксидант болон полифенолууд хамгийн чухал ач䪱богдолтойг тэмдэглэжээ. Түүнчлэн хүнсний ногоо нь бие махбод дахь үрэвсэлт үйл явцыг бууруулдаг гэдэсний микробиомд эерэгээр нөлөөлдөг байна.
Хоол хийх аргын хувьд шинжээчид зөвхөн түүхий эсвэл зөвхөн чанасан ногоонд давуу эрх олгодоггүй. Зарим ашигтай бодисууд дулааны боловсруулалтгүйгээр илүү сайн хадгалагддаг бол зарим нь эсрэгээрээ болгосны дараа биед шингэхдээ хялбар болдог. Тиймээс хамгийн гол зөвлөмж бол хүнсний ногоог өдөр тутмын цэсэндээ тогтмол нэмж хэрэглэх энгийн дадал юм.
