“Айчи-Нагояа 2026” Азийн наадмын цахим спортын Mobile Legends: Bang Bang төрөлд Монголын шигшээ баг амжилттай өрсөлдөж, медалийн болзол хангажээ. Манай баг хасагдах шатанд Хонконгийн шигшээг 2:0-ийн харьцаатай буулган авч, тэмцээний шилдэг дөрөвт шалгарсан байна.
Ингэснээр Монголын цахим спортын баг Азийн наадмаас хамгийн багадаа хүрэл медаль хүртэх боломжоо баталгаажуулж, финалын төлөө өрсөлдөх эрхтэй боллоо.
Монголын шигшээ баг дараагийн тоглолтоо Индонезийн эсрэг хийнэ. Тус тоглолт өнөөдөр 17:45 цагаас эхлэх бөгөөд ялалт байгуулбал финалд шалгарч, Азийн наадмын алтан медалийн төлөө өрсөлдөх юм.
Харин хагас шигшээд шалгарснаар Монголын баг аль хэдийн медалийн бүсэд орсон байна. Одоо Индонезийн эсрэг хийх тоглолт тэдний медалийн өнгийг ахиулах эсэхийг шийдэх чухал тулаан болох нь.
Хасагдах шатны тоглолтод Монголын баг Хонконгийн эсрэг хоёр үе дараалан ялалт байгуулж, цэвэр 2:0-ийн харьцаагаар дараагийн шатанд шалгарсан байна. Энэ ялалтаар тэд “Айчи-Нагояа 2026” Азийн наадмын цахим спортын төрөлд Монголын медалийн боломжийг улам нэмэгдүүлжээ.
2 comments
Манай залуус үнэхээр мундаг байна аа
Утасны тоглоом гэж дутуу үнэлж болохгүй нь ээ, улсынхаа нэрийг сайхан гаргаж байна