ОХУ-ын Ерөнхийлөгч Владимир Путин идэвхтэй цэргийн алба хаагчдын тоог 15,500-аар нэмэгдүүлж, нийт 1.55 саяд хүргэх зарлигт есдүгээр сарын 28-ны өдөр гарын үсэг зурлаа. Ингэснээр ОХУ-ын Зэвсэгт хүчний нийт орон тоо туслах болон иргэний бүрэлдэхүүний хамт 2,441,630-д хүрч байна.
Зэвсэгт хүчний орон тооны тэлэлт
Украины дайн эхэлснээс хойш Кремль цэргийн бүрэлдэхүүнээ тасралтгүй өсгөж байгаа бөгөөд энэ он гарсаар Оросын зэвсэгт хүчинд 52,500 шинэ орон тоо нэмэгджээ. Шинээр нэмэгдсэн орон тоонуудын ихэнх нь дэмжлэгийн үүрэгтэй ажилтнууд гэхээсээ илүүтэй фронтын шугамд шууд үүрэг гүйцэтгэх идэвхтэй алба хаагчид байна.
Зэвсэгт хүчний шинэчлэгдсэн тоо баримтыг нэгтгэвэл:
- Идэвхтэй алба хаагчид: 1.55 сая (15,500-аар нэмэгдүүлсэн)
- Зэвсэгт хүчний нийт орон тоо: 2,441,630
- Энэ онд шинээр нэмэгдсэн орон тоо: 52,500
Дайчилгааны тухай шинжээчдийн байр суурь
Украины Ерөнхийлөгч В.Зеленский ОХУ-ыг томоохон хэмжээний дайчилгаа явуулахаар бэлтгэж, янз бүрийн сувгаар цэрэг татах ажиллагаагаа идэвхжүүлсэн хэмээн мэдэгдээд буй юм.
Гэвч цэргийн шинжээчдийн үзэж байгаагаар Кремль 2022 оны шиг өргөн хүрээний дайчилгаа явуулах магадлал багатай байна. Учир нь дахин өргөн дайчилгаа явуулах нь логистикийн асар том хүндрэл дагуулахаас гадна фронтын шугам дээр үүсээд буй гол асуудлуудыг шийдвэрлэж чадахгүй хэмээн шинжээчид анхааруулжээ.
