Хүнд өвчинтэй тэмцэж буй Холливудын жүжигчин Брюс Уиллисийн охин аавтайгаа авахуулсан шинэ зургаа нийтэлжээ.
2023 оны хоёрдугаар сард тулаант киноны одод деменци (зөнөх өвчин) оношлогдсон юм. Түүнээс хойш алдартан олон нийтийн өмнө бараг үзэгдэхээ больсон билээ. Гэсэн хэдий ч Брюс Уиллисийг түүний ар гэр, ойр дотнынхны цахим хуудаснаас харах боломжтой юм. Жүжигчний эхнэр болон охидууд нь хааяа түүний сүүлийн үеийн зургуудыг хуваалцдаг.
Тухайлбал, энэ удаад Таллула Уиллис аавтайгаа авахуулсан шинэ зургийг нийтэлжээ. Холливудын жүжигчний охин зураг дээр аавыгаа инээмсэглэж байхад нь халамжтайгаар үнсэж байв. Энэхүү кадраас 71 настай жүжигчин одоо хэрхэн харагдаж байгааг болон хэрхэн өөрчлөгдсөнийг харж болно.
“Үнэхээр эгдүүтэй юм!” хэмээн Таллула аавтайгаа авахуулсан зургийн тайлбарт товч бичжээ.
Брюс Уиллисийн охины дагагчид жүжигчний шинэ зургийг хараад маш их баярласан байна. Тэд сэтгэгдэл хэсэгт түүнд зориулж “Түүнд хязгааргүй их хайрыг илгээж байна”, “Үнэхээр эгдүүтэй, үзэсгэлэнтэй юм”, “Нөхцөлгүй хайр” гэх мэт сэтгэлийн дэм өгсөн дулаан үгсийг идэвхтэй бичиж байв.
Тэмдэглэхэд, 2022 онд Брюс Уиллисийн гэр бүлийнхэн түүнийг афази өвчинтэй гэж оношлогдсон тул карьераа өндөрлүүлж байгааг зарласан юм. Дараа нь онош нь өөрчлөгдсөн билээ. Жүжигчин залуу үнэндээ эдгэшгүй бөгөөд хурдацтай даамжирдаг тархины урд болон чамархайн хэсгийн деменцитэй болох нь тогтоогджээ. Нарийн онош тогтоогдсоноос хойш өвчтөнүүдийн дундаж амьдрах хугацаа нь 3-аас 7 жил байдаг байна.
