Цахим спортын “Counter-Strike 2” төрлийн тэргүүлэх мэдээллийн портал “HLTV”-ээс 2026 оны “Шилдэг шинэ тоглогч” (Rookie of the Year) шагналд нэр дэвшигчдийг албан ёсоор зарлалаа. Энэ удаагийн жагсаалтад олон улсын томоохон тэмцээнүүдэд ур чадвараа харуулсан залуу авьяастнуудаас гадна аль хэдийн олонд танигдсан туршлагатай тоглогчид багтсан бөгөөд тэдний дунд Монгол Улсын дөрвөн тамирчин нэрлэгдсэн нь онцлох үйл явдал болов.
Дэлхийн шилдгүүдтэй өрсөлдөх Монголын дөрвөн тамирчин
“HLTV”-ийн нэр дэвшигчдийн жагсаалтад Монголын цахим спортын тавцангаас дараах дөрвөн тоглогч багтсан байна:
- Анарбилэг “cobrazera” Ууганбаяр,
- Есөнтөмөр “nin9” Гантулга,
- Золбаяр “tikuak” Чимэдцэрэн,
- Ирээдүй “DarkMeister” Дугарсүрэн.
Насны хязгаарыг халсан шинэ шалгуур ба ёслолын тов
Зохион байгуулагчдын зүгээс энэ жил нэр дэвшигчдийг тодруулах шалгуур үзүүлэлтдээ томоохон өөрчлөлт оруулжээ. Тодруулбал, тамирчдын насыг харгалзан үзэхээ больж, оронд нь дэлхийн чансааны эхний 20 багийн эсрэг үзүүлсэн тоглолтын гүйцэтгэл болон “Major” зэрэглэлийн тэмцээний хасагдах шатанд (плей-офф) оролцсон тоглолтын тоог гол шалгуур болгосон байна.
Шагналын эзнийг дотоод санал асуулгын дүнгээр тодруулах бөгөөд ялагчийн нэрийг 2027 оны нэгдүгээр сарын 9-нд болох “HLTV Awards” хүндэтгэлийн ёслолын үеэр албан ёсоор зарлах юм. Ташрамд дурдахад, уг шагналын өмнөх эзнээр Казахстаны тамирчин Данил “molodoy” Голубенко тодорч байсан билээ.
Дэлхийн хэмжээний нэр хүндтэй шагналд Монголын дөрвөн ч тоглогч зэрэг нэр дэвшсэн нь манай улсын CS2-ын тамирчдын олон улсын тавцанд өрсөлдөх чадвар, тоглолтын чансаа өндөр түвшинд хүрснийг илтгэж байна. Шалгуурын босгыг өндөрсгөж, шилдэг багуудын эсрэг үзүүлсэн бодит амжилтаар дүгнэх болсон энэ цаг үед монгол залуус ийнхүү дэлхийн шилдгүүдтэй мөр зэрэгцэн өрсөлдөж байгаа нь цахим спортын хөгжилд томоохон түлхэц болж байна.
