Måneskin хамтлагийн 27 настай фронтмен Дамиано Давид, 30 настай жүжигчин Дав Камерон нар хуримаа хийжээ.
Хос Италийн Тосканы төв хэсэгт орших Монтальчино хотод хаалттай ёслол зохион байгуулсан бөгөөд орон нутгийн хэвлэлүүд болон гэрчүүд баярын анхны зургуудыг хэдийн нийтэлж эхэлсэн байна.
Дамиано ёслол болох газарт цагаан өнгийн дээвэр нь онгойдог автомашин жолоодон иржээ. Тэрээр сонгодог хар костюмаас татгалзаж, цайвар өнгийн илүү чөлөөтэй хэв маягийг сонгосон байна. Сүйт бүсгүй ч уламжлалт хуримын даашинзнаас өөр сонголт хийжээ. Камерон зангиатай, хагас тунгалаг цамцан дээр урт цагаан жакет өмсөж, палаццо загварын өмдтэй хослуулсан байна. Гэрлэлтийн бүртгэлийн ёслол Монтальчино хотын захиргааны ордны түүхэн танхимд болж, хотын дарга Сильвио Франческелли гэрлэлтийг албан ёсоор бүртгэжээ.
Хуримын баяр гурван өдөр үргэлжилнэ. Зочдын дунд хосын ойрын найз нөхөд, төрөл төрөгсөд, мөн Måneskin-ийн хуучин гишүүд Виктория Де Анжелис, Томас Раджи, Итан Торкио нар ирэх төлөвтэй байна.
Сануулахад, Дамиано, Дав нарын харилцааны тухай анх 2023 оны 9-р сард, Disney-ийн хуучин од Камерон Måneskin-ийн тоглолт дээр харагдсаны дараа яригдаж эхэлсэн. Үүний дараа жүжигчин бүсгүйг Италийн хамтлагийн тоглолтуудад дахин хэд хэдэн удаа харжээ. Хос 2024 оны 2-р сард “Grammy”-гийн өмнөх үдэшлэгийн улаан хивсний ёслолд анх албан ёсоор хамт гарсан байна. Энэ оны эхээр тэд сүй тавьснаа зарласан.
Өмнө нь Дамиано Давид загвар өмсөгч Жоржия Солеритэй зургаан орчим жил үерхэж байжээ. Måneskin-ийн зарим шүтэн бишрэгч Камероныг хөгжимчнийг хуучин найз бүсгүйгээс нь “булаасан” гэж үздэг бөгөөд мөн хоёр эмэгтэйн гадаад төрх төстэйг онцолдог.
